ვისენტე დელ ბოსკემ მიანიშნა, რომ ევროპის ჩემპიონატის დასრულების შემდეგაც სურს ესპანეთის ნაკრებში მუშაობა. რა თქმა უნდა, ულვაშა მწვრთნელმა კარგად იცის, რომ ეს დიდწილად ევროპაზე ნაჩვენები შედეგებით გადაწყდება – ამიტომაც მხოლოდ მიანიშნებს და გადაწყვეტით არაფერს ამბობს.
დელ ბოსკემ სათამაშო ნიუანსებზე უფრო ისაუბრა – ესპანურ AS-თან.   
- ყველაფერი კარგად მიდის. იტალიასთან მატჩმა ჩაიარა და წინ ირლანდიასთან შეხვედრაა. იმედია, ბრწყინვალე თამაში იქნება.
- ირლანდიელებს სურთ, რომ მატჩამდე გდანსკის სტადიონის მინდორი მოირწყას. რას იტყვით?
- მთავარია, ეს თამაშის ხარისხზე აისახოს, რომელიც გულშემატკივარს მოეწონება.
- ევრო-2012-ის შემდეგ, კონტრაქტის გაგრძელებას აპირებთ?
- ეს ჩემპიონატის შემდეგ გადაწყდება. ესპანეთის ფეხბურთის ფედერაციაში მტრები არ მყავს, ასე რომ, პრობლემა არ უნდა იყოს.
- იტალიასთან არჩეული ტაქტიკის გამო, ბევრმა გაგაკრიტიკათ. რამდენად იმოქმედებს ეს გუნდის თამაშზე?
- ახალბედა არ გახლავართ და მშვენივრად ვხვდები, რომ კრიტიკა სასარგებლოა. აზრის გამოთქმა ყველას შეუძლია და ეს ნორმალურია. ნაკრებში ყველაფერზე პასუხისმგებელი მე ვარ.
- სასტარტო შემადგენლობაში ცვლილებები იქნება?
- რა თქმა უნდა, იქნება.
- არ გაშინებთ ირლანდიელთა სტილი? ისინი მეორე სართულზე არიან ძლიერები.
- მოდით, ასე ვთქვათ – კი არ ვშიშობ, ვფრთხილობ. ირლანდიელებს სხვა დადებითი მხარეებიც აქვთ. მათ ხარისხიანი ფეხბურთელები ჰყავთ, რომლებიც პრემიერლიგაში თამაშობენ. გამოვარჩევდი კევინ დოილს. ის საკმაოდ აგრესიული და მიზანდასახული ფორვარდია, თვალი უნდა გვეჭიროს.
- რა სარგებლობა მოაქვს გუნდისთვის დავიდ სილვას?
- სილვა ბრწყინვალე მოთამაშეა. შესაძლოა, მას გასულ მუნდიალზე თავის გამოჩენის შანსი ვერ მივეცი, მაგრამ ამჟამად უკეთეს ფორმაშია. მისი გვჯერა და ვამხნევებთ.
- ტრაპატონიმ განაცხადა, რომ ირლანდია კონტრშეტევაზე ითამაშებს.
- მზად ვართ. ირლანდიას მართლაც კარგი გუნდი ჰყავს. გადახედეთ ურთიერთსეხვედრების სტატისტიკას: ადრეულ წლებს თუ არ ჩავთვლით, მათ ვერასოდეს ვანადგურებდით. ასე რომ, რთულ მატჩს ველი.
- ვნახეთ, რომ ორმხრივ მატჩში ალვარო ნეგრედომ ბრწყინვალე გოლი შეაგდო. გვითხარით, რის საფუძველზე არჩევთ სასტარტო შემადგენლობას?
- ბევრი ფაქტორია, რომლებსაც ყურადღებას ვაქცევ. გააქვს თუ არა ფეხბურთელს ვარჯიშზე, ამას არ აქვს მნიშვნელობა. მყავს 23 კაცი და ვარჩევ 11-ს.
- არბელოასა და ალბას ყვითელი ბარათი აქვთ მიღებული. ეს არ იმოქმედებს მათ თამაშზე?
- მეორე ყვითელს თუ მიიღებენ, მაშინ იძულებულნი გავხდებით, შემცვლელები მოვუძებნოთ.
- ტრაპატონის მიაჩნია, რომ სასტარტოში ტორესს, ან ლორენტეს დააყენებთ.
- ტრაპატონი მშვენივრად ერკვევა ფეხბურთში და თქვენ არ გაქვთ საფუძველი, რომ მას არ დაუჯეროთ.
- ტორესს არაფერი უთხარით იტალიასთან გაცუდებული მომენტების გამო?
- გარდა მინდორზე მყოფი ფეხბურთელებისა, სკამზე კიდევ 12 კაცია. ყველას რაღაცას ვეუბნები.
- როგორია ჩავის მდგომარეობა?
- არ მიკითხავს. არანაირი ინფორმაცია არ მაქვს იმის შესახებ, თითქოს ჩავის რაიმე პრობლემა ჰქონდეს.

ილია ნანობაშვილი