გერმანიის ბუნდესლიგის XXIV ტურის და ზოგადად, წლევანდელი გათამაშების ცენტრალურ შეხვედრაში, ქვეყნის ჩემპიონი და მიმდინარე გათამაშების მეორეადგილოსანი მიუნხენის “ბაიერნი” ლიდერ “დორტმუნდს” დაუხვდება.
 მომავალი დაპირისპირების წინ, დორტმუნდელთა პრეზიდენტი, ჰანს იოახიმ ვაცკე Bild-ს ესაუბრა და აღიარა, რომ “ბაიერნი” ახლაც ბუნდესლიგის საუკეთესო კლუბად რჩება. მიუხედავად ამისა, “დორტმუნდი” ჩემპიონობისთვის ბოლომდე იბრძოლებს და სეზონის დასრულების შემდეგ, არც გუნდის წამყვან მოთამაშეებს შეელევა.   
- გამარჯვების შემთხვევაში, შეგვიძლია ვივარაუდოთ, რომ “დორტმუნდი” ჩემპიონატს მოიგებს?
- გასაგებია, რომ ეს შეხვედრა იმ კატეგორიათა რიცხვს განეკუთვნება, რომელშიც 6 ქულაზე მიდის თამაში, მაგრამ ტიტულის ბედი სხვა მატჩებში გადაწყდება.
- “ბაიერნის” პრეზიდენტ ული ჰიონესის პროგნოზით, მისი გუნდი 2:0 მოიგებს...
- ეს მისი უფლებაა. თამაშის შემდეგ ვნახავთ, რამდენად ახდება მისი წინასწარმეტყველება. მშობლებმა მორიდებულ ადამიანად აღმზარდეს და პროგნოზისგან თავს შევიკავებ.
- 13 ქულიანი ჰანდიკაპი საკმარისი უნდა იყოს, რათა თქვენმა გუნდმა “ბაიერნის” ჰეგემონია დაამხოს...
- “ბაიერნი” ბუნდესლიგის საუკეთესო გუნდად რჩება, მაგრამ ეს სულაც არ ნიშნავს იმას, რომ მიუნხენელებმა ყველა შეხვედრაში უნდა მოგვიგონ.
- არ გეშინიათ იმის, რომ სეზონის დასრულების შემდეგ “ბაიერნი” თქვენი ვარსკვლავების გადაბირებას ეცდება?
- რაღა თქმა უნდა, მსგავსი მცდელობები იქნება, თუმცა, ჩვენ საკვანძო მოთამაშეებთან ხანგრძლივი ხელშეკრულება გვაკავშირებს. ჩვენ მათ არ დავთმობთ. ისედაც, არა მგონია, რომ ბიჭებიდან ვინმეს გუნდის დატოვება სურდეს.