ქართველი სუმოისტი ლევან გორგაძე იგივე ტოჩინოშინი ზედიზედ მე-4 ბაშოს გამარჯვებული გახდა. ამჯერად, მან ტოკიოს “რიოგოკუ კოკუგიკანში” მიმდინარე სექტემბრის სუპერტუნირზე იპირველა, მიუხედავად იმისა, რომ აკი ბაშოს დასრულებამდე კიდევ 2 ტურია დარჩენილი.
რანგით მე-2 ძურიოს დივიზიონში დასავლეთის მე-5 ნომრის სტატუსით მოასპარეზე ტოჩინოშინმა ზედიზედ მე-13 გამარჯვება იზეიმა და ვინაიდან მეტოქეებს მისი დაწევის თეორიული შანსიც აღარ აქვთ, ქართველი გოლიათი მორიგი ტიტულის მფლობელი გახდა.
შემოდგომის ბაშოს მე-13 დღეს გორგაძემ აღმოსავლეთის მე-13 ნომერი აკისეიამა იორიკირით დაჯაბნა და ჩემპიონობასთან ერთად, მომავალი ტურნირისთვის ელიტარულ მაკუუჩი დივიზიონში ასპარეზობაც გაინაღდა.
სამწუხაროდ, ძალიან წარუმატებელი აღმოჩნდა ტოკიოს ტურნირი ძურიოს დასავლეთის მე-3 ნომერ გაგამარუსთვის. თეიმურაზ ჯუღელმა 4 მოგების წილ უკვე მე-9 მარცხი განიცადა და წოდებაში დაქვეთება
ბოლოსწინა მე-14 დღეს მაკუუჩიში უკვე ტოჩინოშინი დაწინაურეს და იგი ძალებს დასავლეთის მე-10 მაეგაშირა ოკინოუმისთან მოსინჯავს, რომელსაც ზურგს 10 გამარჯვება უმაგრებს. თავის მხრივ, ძურიოს აღმოსავლეთის მე-14 ნომერ კიოკუტაისეის გაეჯიბრება გაგამარუ.
საინტერესოა, რომ მაკუუჩიში პირველი მარცხი განიცადა იოკოძუნა ჰაკუჰომ. მონღოლმა გოლიათმა ოძეკი გოეიდოსთან იორიკირით წააგო და 12 გამარჯვება შერჩა. შედეგად, მას აღმოსავლეთის მე-10 მაეგაშირა იჩინოჯო დაეწია, რომელმაც იოკოძუნა კაკურიუს ჰატაკიკომოით სძლია.
აკი ბაშოს მე-14 დღეს ლიდერები სწორედ ერთმანეთს დაუპირისპირდებიან.
