ამ დღეებში კახეთის რეგიონის მთავარი ქალაქი თელავი ჩოგბურთით ცხოვრობს. ვაჟთა შორის ერთი ტურნირის დასრულების შემდეგ, რომლის საპრიზო ფონდი 15 ათას ამერიკულ დოლარს შეადგენდა, მეორე ტურნირმა აიღო სტარტი, რომლის საპრიზო ფონდიც 15 ათასი ამერიკული დოლარია.

საქართველოს ნომერ პირველ ჩოგბურთელ ნიკოლოზ ბასილაშვილის გარდა, თელავის საერთაშორისო ტურნირში ყველა წამყვანი ქართველი ჩოგბურთელი მონაწილეობს. ძირითად ბადეში 6 ქართველი სპორტსმენი მოხვდა. ესენი არიან ალექსანდრე მეტრეველი (უმცროსი), გიორგი ცივაძე, გიორგი ჯავახიშვილი, მიხეილ ხმიადაშვილი, შოთა მეფარიძე და ალექსანდრე ბაკში. 32-ედ ფინალური შეხვედრები 9 სექტემბერს დაიწყება.

აღნიშნულ ტურნირში საქართველოს გარდა ხორვატიის, რუსეთის, უკრაინის, ფინეთის, აშშ-ს, ავსტრიის, საფრანგეთის, იაპონიის, პოლონეთისა და მონაკოს წარმომადგენლები ასპარეზობენ. შეგახსენებთ, რომ თელავის პირველი საერთაშორისო ტურნირი ხორვატი ტონი ანდროიჩის გამარჯვებით დასრულდა.