ხვალ დილით მელბურნში სტარტს აიღებს ავსტრალიის ღია პირველობა, რომლის საკვალიფიკაციო ტურნირშიც 2 ქართველი ჩოგბურთელი ითამაშებს. 2014 წლის პირველ სლემტურნირში ანა ტატიშვილი და სოფო შაფათავა ჩაებმებიან.
საქართველოს პირველი ჩოგანი ტატიშვილი კვალიფიკაციაში მე-12 ნომრად გახლავთ განთესილი და საწყის რაუნდში კანადელ ალეკსანდრა ვოზნიაკს ეთამაშება. ცნობისთვის, ანას ქალთა საჩოგბურთო ასოციაციის (WTA) რეიტინგში 126-ე ადგილი უკავია, ხოლო ალეკსანდრა 283-ეა, თუმცა კი, 2009 წლის ივნისში კანადელი მსოფლიოს 21-ე ჩოგანი გახლდათ.
ქართველს და კანადელს კარიერის განმავლობაში სამჯერ უთამაშიათ და მინიმალური უპირატესობა ტატიშვილის მხარესაა. ისიც საინტერესოა, რომ სამიდან ორ შემთხვევაში, მატჩი ერთ-ერთი მოთამაშის ტრავმის გამო ვერ ჩამთავრდა.
2011 წელს ალბუკერკში (აშშ) კანადელი 3:6, 6:1, 1:5-ს აგებდა, როდესაც თამაში შეწყვიტა, ხოლო იმავე წელს ლინცში (ავსტრია) უკვე ანა დაშავდა, როდესაც ანგარიში 5:7, 1:2 გახლდათ. ერთადერთი “სრულფასოვანი” შეხვედრა ბუდაპეშტში (უნგრეთი) 2012 წელს ჩატარდა, რომელიც ტატიშვილმა 5:7, 7:6 (7:4), 6:4 მოიგო.
მოკლედ, ქართველ ჩოგბურთელს არცთუ იოლი მატჩი
ძირითად ბადეში გასასვლელად 3 ეტაპის დაძლევაა საჭირო. იმასაც დავძენთ, რომ შარშან ტატიშვილმა ასპარეზობა პირდაპირ ძირითადი ბადიდან დაიწყო და საწყის წრეში იაპონელ აიუმი მორიტასთან 3:6, 3:6 წააგო, ამდენად მელბურნში დასაცავი მხოლოდ 5 ქულა აქვს.
შეიძლება ითქვას, რომ წილისყრის შედეგად გაუმართლა შაფათავას, რომელიც განთესილი არ ყოფილა, თუმცა, საკვალიფიკაციო ბადის პირველ რაუნდში მეტოქედ ნაკლებადცნობილი იაპონელი ერი ჰოზუმი ერგო. ეს უკანასკნელი რეიტინგში 203-ეა, ხოლო სოფოს 214-ე ადგილი უკავია.
შაფათავას და ჰოზუმის WTA-ს ეგიდით არასოდეს უთამაშიათ. თუკი შაფათავამ საწყისი ბარიერი დასძლია, მომდევნო წრეში მე-6 რეიტინგის მქონე უკრაინელი მარინა ზანევსკას და ჩერნოგორიელი დანკა კოვინიჩის წყვილში გამარჯვებულს დაელოდება. ისიც ვთქვათ, რომ სოფოს და ერის მატჩი მე-14 კორტზე მე-4 წყებაში, დაახლოებით 07:30 საათისთვის აიღებს სტარტს.
