საკალათბურთო სუპერლიგის მონაწილე გუნდმა “სოხუმმა” ევროჩელენჯზე თამაშის სურვილი გამოთქვა. ამის შესახებ “მსოფლიო სპორტს” საქართველოს კალათბურთის ფედერაციის პრესსამსახურის წარმომადგენელმა თამუნა რუაძემ განუცხადა.

“სოხუმმა” საქართველოს კალათბურთის ფედერაციაში შემოიტანა განაცხადი, რომლითაც ევროჩელენჯის 2013-14 წლების გათამაშებაში მონაწილეობის სურვილი გამოთქვა. აღნიშნული წერილი FIBA-ს უკვე გადავუგზავნეთ”, - გვითხრა რუაძემ (FIBA-ში ევროჩელენჯზე მონაწილეობის მსურველი გუნდის განაცხადის შეტანის ბოლო ვადა 17 ივნისია).

თუ ყველა პროცედურა მოგვარდა და “სოხუმის” ევროჩელენჯზე მონაწილეობის საკითხი საბოლოოდ გადაწყდა, ზღვისპირელები ყოფილი იუგოსლავიის დაშლის შედეგად წარმოქმნილი ერთ-ერთი ქვეყნიდან მთავარი მწვრთნელის მოწვევას აპირებენ. მთავარ მწვრთნელთან ერთად 4 ლეგიონერის დამატება სურთ, რომლებიც ზემოაღნიშნული ინკოგნიტო ქვეყნიდან და ბალტიისპირეთიდან იქნებიან.

“სოხუმი” ასევე აპირებს 1-2 გამოცდილი ქართველი კალათბურთელი დაიმატოს, რომლებსაც უცხოეთში აქვთ ნათამაშები.

აღსანიშნავია, რომ ქართული კლუბებიდან “სოხუმი” ჯერჯერობით ერთადერთი კლუბია, რომელმაც ევროჩელენჯზე თამაშის სურვილი გამოთქვა.

შეგახსენებთ, რომ ერთხელ, კონკრეტულად კი, ევროჩელენჯის 2011-12 წლების გათამაშებაში, “სოხუმმა” უკვე სცადა ბედი, მაგრამ საკვალიფიკაციო ეტაპზე “მინსკი-2006”-თან ბურთების უარესი შეფარდების გამო დაამარცხა და ასპარეზობას ნაადრევად გამოეთიშა.