ესპანური გამოცემების კვალად, გიორგი შერმადინის გარჯა პოპულარულმა საკალათბურთო პორტალმა Eurobasket.com-მაც დააფასა. შეგახსენებთ, რომ “ბილბაოსთან” მოგებულ შეხვედრაში ქართველმა ცენტრმა 24 წუთში 20 ქულა ჩააგდო, რაც საკმარისი გამოდგა იმისთვის, რომ ხსენებულ ვებ-გვერდს შერმადინი ესპანური ლიგის პირველი ტურის ყველაზე სასარგებლო მოთამაშედ (MVP) ეღიარებინა.

აი რას წერს Eurobasket.com ქართველი კალათბურთელის შესახებ. “ქართველ გიორგი შერმადინს ესპანეთის პირველობის საწყის ტურში ჩინებული საღამო ჰქონდა და საუკეთესოს წოდებაც სამართლიანად დაიმსახურა. 24 წლის კალათბურთელმა ოც ქულას 7 მოხსნა და 2 პასი წაამატა და “სარაგოსას” “ბილბაოს” დამარცხებაში (86:77) დიდად დაეხმარა”.

Eurobasket.com-მა შერმადინის კვალად, საუკეთესოთა ხუთეული ასე დააკომპლექტა: რასმუს ლარსენი (“მანრესა”) – 21 ქ. 13 მ; ალექს მუმბრუ (“ბილბაო”) – 18 ქ. 8 მ. 6 პ; აუგუსტო სესარ ლიმა (“მურსია”) – 17 ქ. 13 მ; ბლაგოტა სეკულიჩი (“კანარიასი”) – 23 ქ. 4 მ. 2 პ.

დასასრულ შეგახსენებთ, რომ “სარაგოსას”, რომელშიც შერმადინის გარდა კიდევ ერთი ქართველი კალათბურთელი ვიქტორ სანიკიძეც ირიცხება, ესპანეთის ჩემპიონატის მე-2 ტურის მატჩი 20 ოქტომბერს ტენერიფეს “კანარიასის” წინააღმდეგ ელის.