მას შემდეგ, რაც ევროლიგას გამოეთიშა, პირეოსის “ოლიმპიაკოსი” საბერძნეთის ჩემპიონატზე გადაერთო და ქართველი ცენტრი გიორგი შერმადინი გუნდში დაბრუნების შემდეგ, შიდა ასპარეზზე პირველად დაასაქმა

პირეოსელები ათენში მე-5 ადგილზე მყოფ “ნეა კაფისას” ესტუმრნენ და დაძაბულ ბრძოლაში 75:67 სძლიეს, შერმადინი კი სტუმართა რიგებში ერთ-ერთი საუკეთესო იყო.

ქართველი კალათბურთელი “ოლიმპიაკოსის” სასტარტო ხუთეულში გამოჩნდა და 14:01 წუთში 13 ქულა, 5 მოხსნა და 1 პასი მიითვალა. გიორგიმ 7-დან 4 ორქულიანი და 6-დან 5 საჯარიმო ჩააგდო, ერთადერთი შეცდომა დაუშვა, არ დაჯარიმებულა, მის წინააღმდეგ კი თამაშის წესები 4-ჯერ დაირღვა.

შერმადინის სარგებლიანობის კოეფიციენტი 18 გახლდათ, რითაც იგი თანაგუნდელთაგან მხოლოდ გეორგიოს პრინტეზისს (23) ჩამორჩა. ამ უკანასკნელმა 15 ქულა და 7 მოხსნა მიითვალა.

“ოლიმპიაკოსმა” 25 მატჩში 23 მოგება მოაგროვა და გამარჯვებათა რაოდენობით ლიდერ “პანათინაიკოსს” გაუტოლდა, თუმცა, კი, ათენელებს 1 თამაში მარაგში აქვთ.

პირეოსელებს რეგულარული სეზონის დასკვნითი მატჩი 3 მაისს ელით, როდესაც შინ ათენის “პანიონიოსს” დაუხვდებიან.