საქართველოს ეროვნული ნაკრების წევრმა თორნიკე შენგელიამ “ბრუკლინ ნეთსიდან” განვითარების ლიგის ბინადარ “სპრინგფილდ არმორში” მორიგი განათხოვრების შემდეგ პირველი მატჩი ჩაატარა.

სპრინგფილდელები ნევადურ “რენო ბიგჰორნსთან” გასვლით მატჩში უიმედოდ დამარცხდნენ (121:79), ქართველმა კალათბურთელმა კი სასტარტო ხუთეულში ითამაშა და 27:22 წუთში 9 ქულა, 6 მოხსნა, 2 პასი და 2 დაფარება მიითვალა.

შენგელიამ 7-დან 3 ორქულიანი და 4-დან 3 საჯარიმო ჩააგდო, 1 სამქულიანი ააცილა, ბურთი 5-ჯერ დაკარგა, 2-ჯერ დაუფარეს და 3 პერსონალური ფოლი მიიღო.

“არმორმა” 4 მოგების წილ მე-12 მარცხი განიცადა და განვითარების ლიგის აღმოსავლეთ დივიზიონში მე-4 ადგილზე იმყოფება. სპრინგფილდელები მორიგ შეხვედრას 10 იანვრის დილას “აიოვა ენერჯის” წინააღმდეგ ჩაატარებენ. 

ამასობაში, “ბრუკლინმა”, რომელიც საშინელი სტარტის შემდეგ ნელ-ნელა ფორმაში შედის, ზედიზედ მე-4 შეხვედრაში იმარჯვა. “ნეთსმა” შინაურ კედლებში “გოლდენ სტეიტ უორიორსი” მიიღო და მეტოქე, რომელსაც ზურგს მიჯრით 10-მატჩიანი მოგებათა სერია უმაგრებდა, 102:98 დაამარცხა.

მასპინძელთა თავკაცმა ჯეისონ კიდმა მხოლოდ 9 კალათბურთელი დატვირთა, რომელთაგან საუკეთესო ჯო ჯონსონი გახლდათ 27 ქულით. ენდრიუ ბლატჩმა 17 ქულა ჩააგდო, კევინ გარნეტმა და შონ ლივინგსტონმა 13-13, ხოლო ბოსნია-ჰერეცგოვინის ნაკრების ლიდერ მირზა ტელეტოვიჩს ორმაგ დუბლამდე 2 ქულა დააკლდა – 8 ქულა, 10 მოხსნა.

“ნეთსმა” 21 მარცხის წილ უკვე მე-14 გამარჯვება იზეიმა და ატლანტის დივიზიონში მე-2 ადგილზე გადაინაცვლა, მთელს აღმოსავლეთ კონფერენციაში კი მე-8 საფეხურზეა. ბრუკლინელები შემდეგ შეხვედრას 11 იანვრის დილას ფლორიდაში “მაიამი ჰითთან” გამართავენ.