სევილიის “პალასიო მუნისიპალ დე დეპორტეს სან პაბლოს” არენაზე ხორვატია სენეგალს შეხვდა და მიმდინარე მუნდიალზე ბალკანელებმა პირველი მარცხი განიცადეს. გუშინ სენეგალმა თავის ისტორიაში პირველი მოგება იზეიმა მსოფლიოს ჩემპიონატებზე, დღეს კი მიმდინარე ტურნირის პრიზიორობის ერთ-ერთ კანდიდატს სენსაციურად სძლია.

ეროვნულ საკალათბურთო ასოციაციის “მინესოტა თიმბერვულვზის” წევრი, ცენტრის გორგუი დიენგის (211 სმ) სოლიდური თამაშის წყალობით სენეგალელებმა პირველი ტაიმში 9 ქულიან უპირატესობას მიაღწიეს, მესამე-მეოთხე პერიოდები ხორვატებმა კი მოიგეს, მაგრამ აფრიკელებთან საბოლოოდ უარყოფითი ბალანსის აღმოფხვრა ვერ შეძლეს.

მატჩის საუკეთესო კალათბურთელის დიენგის აქტივში 27 ქულა, 8 მოხსნა, 3 შედეგიანი გადაცემა, 2-2 დაფარება და ჩაჭრაა. ხორვატთაგან 15-15 ქულა სარიჩმა და ბოგდანოვიჩმა მიითვალეს, ტომიჩის ანგარიშზე კი 14 ქულა და 9 მოხსნაა.

B ჯგუფში ხორვატებსა და სენეგალელებს 2-2 მოგება და თითო მარცხი აქვთ. 

მსოფლიოს ჩემპიონატი კალათბურთში

სევილია. ჯგუფი B

ხორვატია – სენეგალი 75:77 (16:18, 16:23, 20:18, 23:18)