ესპანურმა “სარაგოსამ” ეროვნული ჩემპიონატის კვალად, ევროთასის გათამაშებაშიც წარმატებული სტარტი აიღო და ისე როგორ იქნებოდა, თავი არაგონული კლუბის ახალ ლიდერებს არ გამოეჩინათ. ცხადია, საუბარია სარაგოსელთა ქართველ ახალწვეულებზე – გიორგი შერმადინსა და ვიქტორ სანიკიძეზე, რომელთაც ესპანურ კლუბში ჩინებული სადებიუტო მატჩები აქვთ.

ბელგიურ “მონსთან” იოლად მოგებულ შეხვედრაში (73:56) ორივე ქართველმა კალათბურთელმა სასტარტო შემადგენლობაში ითამაშა. შერმადინმა მოედანზე 25:34 წუთი გაატარა და არაგონელთა მაისურით პირველი ორმაგი დუბლი მიითვალა.

ქართველმა ცენტრმა 7-დან 3 ორქულიანი და 4-ვე საჯარიმო ჩააგდო და ათ ქულას ამდენივე მოხსნა და (4 მეტოქის ფარზე) 2 პასი და 1 ჩაჭრა წაამატა. გიორგიმ ბურთი ერთხელ დაკარგა და ამდენჯერვე დაჯარიმდა, მის წინააღმდეგ კი 3-ჯერ დაჯარიმდნენ.

საბოლოოდ, შერმადინის სარგებლიანობის კოეფიციენტმა 20-ს უწია, რითაც იგი “სარაგოსას” კიდევ ერთ წამყვან მოთამაშე ჯონათან ტაბუს გაუტოლდა. ბელგიის ნაკრების უკანახაზელის მონაგარი 10 ქულა და 6 მოხსნა იყო.

რაც შეეხება სანიკიძეს. მან მოედანზე 27:00 წუთი გაატარა და მასპინძლებს 8 ქულა, 7 მოხსნა და 1 ჩაჭრა წაამატა. ვიქტორმა 2-დან 1 ორქულიანი, 3-დან 1 სამქულიანი და 4-დან 3 საჯარიმო გამოიყენა, 1 პერსონალური ფოლი მიიღო, მასზე კი თამაშის წესები 4-ჯერ დაირღვა.

ქართველთა კლუბი ევროთასზე მომდევნო მატჩს 23 ოქტომბერს ბერლინში “ალბას” წინააღმდეგ ჩაატარებს, რომელმაც პირველ ტურში კიდევ ერთ გერმანულ კლუბ “ტელეკომ ბასკეტსს” ბონში 86:65 სძლია.