“ტოსოს” ნახევარმცველმა ანდრეი ბოჩკოვმა, რუსეთის საფეხბურთო პირველი დივიზიონის მე-9 ტურში სტუმრად “ტომთან” დაპირისპირების (2:2) შემდეგ, თანაგუნდელ მეკარე ნუკრი რევიშვილს მატჩის გმირი უწოდა.

“არც ვიცი ეს ფრე როგორ შევაფასო. რა თქმა უნდა, დაუკმაყოფილებლობის გრძნობა მაქვს, რადგან ორბურთიანი უპირატესობა ვერ შევინარჩუნეთ. სრულებით გეთანხმებით, რომ ნუკრი რევიშვილი მატჩის გმირია. მან ყველაფერი “გამოაძრო” რაც შეიძლებოდა და კიდევ უფრო მეტი, მათ შორის პენალტი. ყოჩაღ ნუკრი” – იუწყება “ტოსნოს” ფეხბურთელის სიტყვებს ინტერნეტპორტალი sportbox.ru.

განვლილი მატჩის 68-ე წუთზე, როდესაც “ტოსნო” 2:0 იგებდა, რევიშვილმა “ტომის” ფეხბურთელის მიერ შესრულებული პენალტი მოიგერია. თუმცა, მოგვიანებით მასპინძლებმა ანგარიში გაათანაბრეს, რაც ქართველი მეკარის ბრალი არაა. რევიშვილის გარდა, “ტოსნოში” გიორგი ნავალოვსკიმაც შეუცვლელად ითამაშა, დებიუტი ჰქონდა გუნდში ახლახან გადასულ ოთარ მარცვალაძეს, რომელმაც მოედანზე მეორე ტაიმი გაატარა, ხოლო მიხაილ გორელიშვილი სათადარიგოთა სკამზე ჯდომით შემოიფარგლა.