გასული საფეხბურთო არდადეგები ქუთაისის „ტორპედოსთვის“ ჩვეულებრივზე უფრო დიდხანს გაგრძელდა. წინა ორი წლისგან განსხვავებით, ევროსარბიელის მიღმა დარჩენილი ქუთათურები ზაფხულის მოსამზადებელ პერიოდს ამჯერად მხოლოდ შიდა ასპარეზისთვის გამოიყენებენ.

უცვლელია გუნდის სამწვრთნელო შტაბი, რომელსაც გამოცდილი სპეციალისტი რევაზ ძოძუაშვილი ხელმძღვანელობს. რაც შეეხება „ტორპედოდან“ წასულ ფეხბურთელებს, ამჟამად, მათი რაოდენობა სულ სამია, როინ კვასხვაძე, ირაკლი ლექვთაძე და ბექა ტუღუში კარიერას, შესაბამისად, კვიპროსულ „ოთელოსში“, ბოლნისის „სიონში“ და ს/კ „ზესტაფონში“ გააგრძელებენ. აქვე, მათ მადლობას ვუხდით გაწეული სამსახურისთვის და წარმატებებს ვუსურვებთ ახალ კლუბებში.

1 ივლისს, ქვეყნის 3-გზის ჩემპიონი საკუთარ საწვრთნელ ბაზაზე არასრული შემადგენლობით შეიკრიბა, რაც იმით იყო გამოწვეული, რომ ჯერ კიდევ არ გადაწყვეტილა კლუბის ბიუჯეტის მოცულობა, რომელსაც ნათელი უახლოეს დღეებში უნდა მოეფინოს, აქედან გამომდინარე, გაფორმდება ახალი კონტრაქტებიც.

გარდა ძველი ფეხბურთელებისა, რომელთა შორის იყო ტრავმამორჩენილი მარჯვენა მცველი ვაჟა ტაბატაძეც, გუნდის საწვრთნელ პროცესში მონაწილეობა მიიღეს ახალმა სახეებმაც: ვაჟა ლომაშვილმა, შოთა ბაბუნაშვილმა და ვახტანგ კვარაცხელიამ. ასევე, ვარჯიშზე მრავლად იყვნენ სინჯებზე მყოფი ფეხბურთელი.

თუ რა სიახლეებია მოსალოდნელი „ტორპედოში“, ამასთან დაკავშირებით ჩვენი გუნდის მთავარ მწვრთნელს რევაზ ძოძუაშვილს ვესაუბრეთ.

„უმჯობესი იქნებოდა, რომ ვარჯიშის განახლებამდე დიდი პაუზა არ გაგვეკეთებინა, მაგრამ ხანდახან არის ხოლმე გადასალახი მსგავსი ბარიერები. კიდევ კარგი, რომ გამოცდილი გვაქვს ასეთი ცხოვრება და ვიცით გაჭირვების დროს, როგორ შემოვატრიალოთ მდგომარეობა ჩვენს სასიკეთოდ.

დასანანია, რომ კვასხვაძის, ტუღუშისა და ლექვთაძის სახით ის სამეული დაგვემშვიდობა, რომელიც ფუნდამენტი იყო გუნდის. ეს დიდი დანაკლისია, მაგრამ ფეხბურთში არის ასეთი კანონებიც და ძლიერი სწორედ მაშინ ხარ, როცა კარგს შეცვლი უკეთესით.

ერთია სპორტული მხარე, რომელშიც მოედანზე მწვრთნელებისა და ფეხბურთელების მუშაობა შედის, რაც, ვფიქრობ, რომ გასულ სეზონში ჩვენ წარმატებით შევასრულეთ, მეორე კი ფინანსური მხარეა. ბიზნესის თვალით რომ შევხედოთ, კლუბმა ცუდად იმუშავა, რადგან ისეთი ფეხბურთელები წავიდნენ, რომ, არაა გამორიცხული, მათში ჩვენ ჯამურად მილიონი ლარი აგვეღო. ეს იმის გამოა, რომ კონტრაქტები იყო არასახარბიელო და იმედი მაქვს, გამოსწორდება ეს საქმეც, რისთვისაც ძლიერი ფინანსისტია საჭირო.

ბევრი კარგი დაპირება მივიღეთ ქალაქისა და გუბერნიის ხელმძღვანელებისგან, მაგრამ, ვნახოთ, რეალურად რა იქნება. უახლოეს დღეებში ბევრი რამ გაირკვევა, უნდა შედგეს სამთავრობო სხდომა, რომლის შედეგებზე ჩვენი მომავალიც იქნება დამოკიდებული.

როგორც ხედავთ, ვარჯიშს შევუდექით და მინდა გითხრათ, რომ „ტორპედოში“ თამაშის მსურველი ბევრია, მათ შორის ისეთებიც, რომლებსაც უკვე დამტკიცებული აქვთ თავიანთი შესაძლებლობები.

გვაიმედებენ, რომ ახალი სეზონის დაწყებამდე „ტორპედო“ უცხოურ შეკრებასაც გაივლის და გვექნება ახალი ეკიპირებაც, თუმცა საბანი სადამდეც გაგვწვდება, იქამდე უნდა დავიფაროთ.

ჩვენ ყველანაირად მზად ვართ, შესაფერისი პირობების შექმნის შემთხვევაში, თუ მიზნად დაგვისახავენ ევროასპარეზზე გასვლას, ასეც მოხდება.

შარშან დაგვავალეს უმაღლესი ლიგიდან არ გავარდეთო და ქვედა ექვსეულში პირველი ადგილი ავიღეთ. ამდენად, დაფინანსების შესაბამისი მოთხოვნა იქნება.

ეჭვი არ მეპარება იმაში, რომ „ტორპედო“ ისევ იმ სიმაღლეზე იდგება, რომელზეც უნდა იყოს, რადგან ეს კლუბი ქართული ფეხბურთის ერთ-ერთი ფლაგმანია“.

www.fctorpedo.ge