რაულ გონსალეს ბლანკომ მადრიდის “რეალის” შემადგენლობაში სარეკორდო რაოდენობის გოლები (323) გაიტანა და ყველაზე მეტი შეხვედრაც (741) ჩაატარა. “ბლანკოსის” რიგებში რაულის მიერ მოპოველ ტიტულთა ჩამონათვალი შთამბეჭდავად გამოიყურება – კასტილიელთა ყოფილმა “შვიდიანმა” მშობლიურ გუნდთან ერთად სამჯერ იმარჯვა ჩემპიონთა ლიგაზე, ექვსჯერ ესპანეთის ჩემპიონის წოდებას დაეუფლა, მოიგო საკონტინენტთაშორისო თასი და ევროპის სუპერთასი. 2 წლის განმავლობაში რაული გელზენკირხენის “შალკეს” ღირსებას იცავდა და რურელ “ხუმარებთან” ერთად გერმანიის თასი და სუპერთასი მოიგო. შარშან ლეგენდარული ფორვარდი ყატარის “ალ სადის” შემადგენლობაში ჩაირიცხა და ამ გუნდთან ერთად წლეულს კიდევ ერთი ეროვნული ჩემპიონატის გამარჯვებული გახდა.

სამწლიანი პაუზის შემდეგ რაულ გონსალეს ბლანკო მადრიდის “რეალის” მაისურით კვლავ გავა “სანტიაგო ბერნაბეუს” მინდორზე. ეს ფაქტი ამაღამ მოხდება, როდესაც რაულის საბენეფისო მატჩში ერთმანეთის პირისპირ “ბლანკოსი” და “ალ სადი” წარსდგებიან. მანამდე კი მადრიდელთა ყოფილმა ფორვარდმა ინტერვიუ მისცა თავისი ამჟამინდელი კლუბის ოფიციალურ ვებგვერდს და მომავალი მატჩის გარდა, სხვა საინტერესო თემებზეც ისაუბრა.

 - რამდენად მნიშვნელოვანია თქვენთვის მადრიდში ჩამოსვლა? “სანტიაგო ბერნაბეუ” ბოლომდე შეივსება და საინტერესო მატჩის მოლოდინით მიადევნებს თვალს მატჩს...

- დიდი იმედი მაქვს, რომ ფეხბურთელები მაყურებელს ლამაზ საფეხბურთო სანახაობას შევთავაზებთ. ყოველმხრივ შევეცდები გულშემატკივარს ჩემი საუკეთესო თამაში ვუჩვენო. ვფიქრობ, მათ კმაყოფილს დავტოვებ, თანაც, პირველ ტაიმს “ალ-სადის” შემადგენლობაში ჩავატარებ, შესვენების შემდეგ კი რამდენიმეწლიანი პაუზის შემდეგ კვლავ მოვირგებ მადრიდის “რეალის” მაისურს

- როგორ შეაფასებდით ჟოზე მოურინიოს მოღვაწეობას “ბლანკოსის” დამრიგებლის პოსტზე და რას ფიქრობთ “რეალის” მთავარ მწვრთნელად კარლო ანჩელოტის დანიშვნის თაობაზე? აქვე თქვენი თვალსაზრისი კლუბის ხელმძღვანელობის თაობაზეც გაგვიმხილეთ...

- მოურინიოს საქმიანობას დადებითად შევაფასებდი, ანჩელოტის რაც შეეხება, იგი მსოფლიოს ერთ-ერთი საუკეთესო საფეხბურთო სპეციალისტია და ეჭვიც არ მეპარება, “რეალს” ტიტულებს მოაგებინებს. “სამეფო კლუბის” უფროსობას რაც შეეხება, ეს ადამიანები თავიანთ საქმიანობას მაღალპროფესიულად წარმართავენ და ყველაფერს აკეთებენ საიმისოდ, რათა მადრიდის “რეალის” კიდევ უფრო განვითარდეს და ახალ-ახალ წარმატებებს მიაღწიოს.

- გულშემატკივართა შორის კვლავ აქტუალურია გარეთ ბეილის “სანტიაგო ბერნაბეუზე” გადასვლის საკითხი. როგორ გგონიათ, უელსელი “ბლანკოსისთვის” შესაფერისი შენაძენი იქნება?

- ბეილი ბრწყინვალე ფეხბურთელია და ყოველგვარი ჭოჭმანის გარეშე შემიძლია დაბეჯითებით ვთქვა, რომ “რეალს” კარგადაც შეერწყმებოდა და სარგებლობასაც მოუტანდა, მაგრამ მეორე საკითხია, რამდენად რეალურია მისი სატრანსფერო ფასი. ვფიქრობ, ამხელა თანხა არცერთი მოთამაშე არ ღირს. ბეილის სანაცვლოდ “ტოტენჰემი” ზომაზე მეტად გაბერილ ფულს ითხოვს.

- პრიმერა დივიზიონის სტარტის წინ რა პროგნოზს გააკეთებთ?

- “ბარსელონას” მეტად ძლიერი შემადგენლობა ჰყავს და ახალს არაფერს ვიტყვი, თუკი განვაცხადებ, რომ საჩემპიონო ბრძოლა კვლავინდებურად “რეალსა” და “ბარსას” შორის წარიმართება.

- მოდით თქვენ კარიერაზეც ვისაუბროთ. რა შეფასებას მისცემთ გასულ სეზონში “ალ სადის” გამოსვლას?

- ყატარის ეროვნულ ჩემპიონატში სოლიდურად გამოვიყურებოდით, მაღალი კლასის თამაში ვუჩვენეთ მაყურებელს და პირველობაც სავსებით დამსახურებულად მოვიპოვეთ. საკუთარი ასპარეზობითაც კმაყოფილი დავრჩი.

- მომავალი სეზონისგან რას ელით?

- დიდი იმედი მაქვს, “ალ სადი” კვლავინდებურად გაახარებს თავის ერთგულ გულშემატკივარს და წარმატებას მიაღწევს როგორც საშინაო ასპარეზზე, ასევე აზიის ჩემპიონთა ლიგაზეც.