საფრანგეთის ღია პირველობის მოქმედი ჩემპიონის რაფა ნადალის მიღწევებს ბოლო არ უჩანს. “როლან გაროსის” დღევანდელ ნახევარფინალში მანაკორელმა შოტლანდიელ ენდი მარეის 6:3, 6:2, 6:1 მოუგო, საფრანგეთის ღია პირველობაზე ზედიზედ 34-ედ იმარჯვა და წლის რიგით მეორე სადიდსლემო ტურნირის ფინალში სარეკორდოდ, მეცხრედ გააღწია. სულ კი ნადალი კვირას თავის მეოცე გადამწყვეტ მატჩს ითამაშებს დიდი სლემის შეჯიბრებებზე.

ნადალისა და მარეის მატჩი საათსა და 40 წუთს გაგრძელდა. რაფამ დამაჯერებლად იმარჯვა და ფინალში ნოვაკ ჯოკოვიჩს შეხვდება. შეგახსენებთ, ნადალი და ჯოკოვიჩი საფრანგეთის ღია პირველობის გადამწყვეტ მატჩში ერთმანეთს 2012 წელს დაუპირისპირდნენ და შარშანწინ მალიორკელმა ოთხსეტიან პაექრობაში დაამარცხა ბელგრადელი.

მარეისთან ნახევარფინალის დასრულების შემდეგ რაფამ ტრიბუნებზე მყოდ საზოგადოებას თავდაპირველად ფრანგულად მიმართა: “მიმდინარე ტურნირზე ჩემი საუკეთესო თამაში ვაჩვენე. ფილიპ შატრიეს კორტზე შესანიშნავი ატმოსფერო იყო. მადლობა ჩემ ერთგულ ქომაგებს მხარდაჭერისთვის. პარიზში თანდათან ვუმატებ და იმედია, ნოვაკ ჯოკოვიჩთან საუკეთესო თვისებებს გამოვავლენ. ისე კი, ნოვაკთან თამაში ჩემთვის სერიოზული გამოწვევაა”, - თავისი სიტყვის დასკვნითი ნაწილი რაფამ ინგლისურად წარმოთქვა.