ბილბაოში თურქეთმა და ფინეთმა საკალათბურთო თრილერი გაითამაშეს. პირველ ტაიმში გამოცდილი სპეციალისტის ჰერმან დეტლაფის სკანდინავიელები ერთი ტავით მაღლა იდგნენ ანატოლიელ მეტოქეზე და დიდ შესვენებაზე პლუს 17-ით გავიდნენ.

შესვენების შემდეგ ომერ აშიკმა და კომპანიამ მეთოდურად იწყო ანგარიშში სხვაობის შემცირება. მეოთხე პერიოდის ბოლო წამები სულაც დრამატული გამოდგა. ფინელები 3 ქულას იგებდნენ და მათი ლიდერი პეტერი კოპონენი საჯარიმო ხაზზე დადგა. მისი ორივე მცდელობა უშედეგო გამოდგა, თურქმა ცეტინ აკიოლუმ კი ზუსტად გაისროლა სამქულიანი და მატჩიც დამატებით დროში გადავიდა. ოვერტაიმში თურქები პირველად დაწინაურდნენ ანგარიშში და მოგებაც ხელიდან აღარ გაუშვიათ. გამარჯვებულთაგან ომერ აშიკის ანგარიშზე 22 ქულა და 5 მოხსნაა, ემირ პრელჯიჩმა კი 13 ქულას, 8 მოხსნა და 5 შედეგიანი გადაცემა მიამატა.

თურქებმა მეორე მატჩი მოიგეს, ფინელებს კი ჯგუფური ეტაპის ბოლო ტურის წინ ერთადერთი გამარჯვება აქვთ.

სლოვენიას ანგოლასთან გაუჭირდა. 3 მეოთხედის შემდეგ აფრიკელები ბალკანელებს ქულას უგებდნენ, მაგრამ დასკვნით მეოთხედში ევროპელებმა იძალეს და ზედიზედ მეოთხე მატჩი მოიგეს. სლოვენიელთაგან ყველაზე შედეგიანი ერაზემ ლორბეკი იყო 17 ქულით (მისსავე აქტივში 4 შედეგიანი გადაცემაცაა), გუნდის ლიდერ ზორან დრაგიჩს რაც შეეხება, იგი პარკეტზე მესამე პერიოდის შუაწელიდან მოყოლებული არ გამოჩენილა, თუმცა, 14 ქულის, 3 მოხსნის, 2-2 შედეგიანი გადაცემისა და ჩაჭრის დაგროვება მოასწრო.

მესამე მატჩი მოიგო ბრაზილიამ და პლეი ოფი გაინაღდა. მათთან პირველი ტაიმი სერბებმა უშანსოდ წააგეს (32:48), მეორე ტაიმის საწყის მონაკვეთში კი მეტოქეებმა როლები გაცვალეს – ბალკანელებმა მესამე ათწუთიანი მონაკვეთი 20 ქულიანი სხვაობით (32:12) მოიგეს და ანგარიშშიც წინ გაიჭრნენ. დასკვნითი პერიოდი ევროპელებმა აშკარად ჩააგდეს. მათ მხოლოდ 9 ქულის მოპოვება მოახერხეს და ცხადია, მატჩიც დათმეს. წაგების მიუხედავად, სერბებიც პლეი ოფში ითამაშებენ. ბრაზილიელთაგან განსაკუთრებული აღნიშვნის ღირსი მარკინიოს ვიეირაა, რომელმაც 6 სამქულიანი ჩააგდო (9 მცდელობიდან), სულ კი 21 ქულას და 5 მოხსნას მოუყარა თავი. 

მსოფლიოს ჩემპიონატი კალათბურთში

სევილია. ჯგუფი B

სენეგალი – არგენტინა 46:81 (15:20, 9:21, 14:12, 8:28)

ლას პალმასი. ჯგუფი D

სლოვენია – ანგოლა  93:87 (17:17, 27:26, 21:23, 28:21)

ბილბაო. ჯგუფი C 

თურქეთი – ფინეთი 77:73 დ.დ. (10:15, 17:26, 26:18, 15:9, 9:5)

გრანადა. ჯგუფი A

სერბეთი – ბრაზილია 73:81 (16:23, 16:25, 32:12, 9:21)