უკრაინული საფეხბურთო კლუბ “ოლექსანდრიას” პრეზიდენტმა ნიკოლაი ლავრენკოვმა გაზეთ “კომანდასთან” ინტერვიუში გუნდიდან მთავარი მწვრთნელის, ვოლოდიმირ შარანის სავარაუდო დათხოვნაზე ისაუბრა და გაცილებით ვრცლად დავით თარგამაძის თემას შეეხო.
ნიკოლაი ლავრენკოვი: “არასახარბიელო მდგომარეობის გამოსასწორებლად აქტიური მოქმედებაა საჭირო. არ დავმალავ, რომ ცვლილებები შესაძლოა სამწვრთნელო შტაბსაც შეეხოს. კერძოდ, დღესდღეობით მოლაპარაკებას რამდენიმე ცნობილ სპეციალისტთან ვმართავთ და არაა გამორიცხული, ერთ-ერთი მათგანი “ოლექსანდრიას” სათავეში ჩაუდგეს. წავა თუ დარჩება გუნდის ამჟამინდელი თავკაცი ვოლოდიმირ შარანი, კვირის ბოლოს გახდება ცნობილი”.
- როგორც ჩვენთვის ცნობილია, მთავარი მწვრთნელის გადადგომასთან ერთად, შესაძლოა, თქვენი კლუბისთვის კიდევ ერთი მნიშვნელოვანი მოვლენაც მოხდეს – დავით თარგამაძე წავიდეს...
- მოვლენათა ასეთ განვითარებას არ გამოვრიცხავ. თარგამაძეს სხვა გუნდში გადასვლა უნდა. მისი მენეჯერს ერთდროულად რამდენიმე კლუბთან აქვს მოლაპარაკებები. თუმცა, ქართველი ნახევარმცველის ტრანსფერის შესახებ კონკრეტული საუბარი პირადად მე არავისთან მქონია.
 - ამბობენ, რომ დავითი პრაქტიკულად მოელაპარაკა დონეცკის “შახტარს”...
- ვიცი, რომ დონეცკური კლუბის წარმომადგენლები თარგამაძით აქტიურად არიან დაინტერესებულნი. თუმცა, როგორც ჩემთვის ცნობილია, ნებისმიერი ფეხბურთელის მიმართ, ვისაც “შახტარში” თამაში სურს, დონეცკელები ძალიან მომთხოვნები არიან. გარდა ამისა, დავითი მოსკოვშიც იყო ჩასული - მის სავარაუდო დამსაქმებელთა შორის რამდენიმე რუსული კლუბიცაა. რაც შეეხება ინფორმაციას, თითქოს წინადადება თბილისის “დინამოდან” გვაქვს, სიმართლეს არ შეესაბამება. საქმე ისაა, რომ თარგამაძეს საქართველოში თამაში კატეგორიულად არ სურს.
- გამოდის, რომ “ოლექსანდრიას” ერთ-ერთ საუკეთესო მოთამაშეს გონებაში უკვე დაემშვიდობეთ?
- მაინც ვიმედოვნებ, რომ თარგამაძე ჩვენს გუნდში დარჩება და მის რიგებში წარმატებით არა მხოლოდ მიმდინარე ჩემპიონატის საგაზაფხულო ნაწილს ჩაატარებს, არამედ 2013 წლამდე ითამაშებს, ვიდრე “ოლექსანდრიასთან” მოქმედი კონტრაქტი ამოეწურება.
 

მოამზადა ლაშა თაბაგარმა