მიუნხენის "ბაიერნის" მეკარე მანუელ ნოიერი ფიქრობს, რომ ბავარიელებს "შალკესთან" იოლი მატჩი არ ელით. გერმანელი თანაგუნდელებს აფრთხილებს, რომ მისი ყოფილი კლუბი გამოცდილი გუნდია და სერიოზულად მოპყრობა მართებთ.
"ჩვენ იოლი გასეირნების მოლოდინში არ უნდა ვიყოთ. ბუნდესლიგაში "შალკეს" როლიდან გამომდინარე, მათთან მოგება გაგვიჭირდება. ჩვენ ვიცით მეტოქე ამ დროისთვის როგორ ფორმაში იმყოფება და ყველაფერს გავაკეთებთ მატჩის მოსაგებად. თუ ვიფიქრებთ, რომ სამი ქულის მოპოვება ადვილი იქნება, ამით დიდ შეცდომას დავუშვებთ" _ განუცხადა ნოიერმა ბაიერნის ოფიციალურ საიტს.
დღეს "ველტინს არენაზე" "შალკესა" და "ბაიერნის" დაპირისპირება 20:30 საათზე დაიწყება.
გიორგი ბალახაძე
