მადრიდის “რეალის” მთავარი მწვრთნელი, ჟოზე მოურინიო მისი გუნდის ლიდერს, რონალდუს მსოფლიოს საუკეთესო ფეხბურთელს უწოდება, მაგრამ პორტუგალიელი იქვე აცხადებს, რომ თანაგუნდელების გარეშე მოგება კრიშტიანუსაც კი არ შეუძლია.
“რონალდუ მსოფლიოს საუკეთესო ფეხბურთელია. დიეგო მარადონას თამაში მინახავს, პელეზე ბევრი მსმენია, მაგრამ კრიშტიანუ დაუჯერებელი ფეხბურთელია. ის უბრალოდ საუკეთესოა. მიუხედავად ამისა, თამაშის მარტოს მოგება მასაც კი არ შეუძლია. წარმატების გასაღები გუნდურ თამაშშია.
როდესაც ვაგებთ, ამაში რონალდუს არ ვადანაშაულებთ. ზუსტად ასევე, ჩვენი მოგებები მხოლოდ მისი დამსახურება არაა. თანაგუნდელების გარეშე, კრიშტიანუ არაფერს წარმოადგენს. ისევე, როგორც “რეალი” მის გარეშე “რეალი” არაა.” – ციტირებს მოურინიოს სიტყვებს Goal-ი.
როგორც სჩანს, რონალდუსთან დაკავშირებით მოურინიოს წარმოდგენა მუდმივად უკეთესობისკენ იცვლება. როდესაც ის “ჩელსის” წვრთნიდა, ხოლო კრიშტიანუ “მანჩესტერში” თამაშობდა, “განსაკუთრებულისთვის” “წითელი ეშმაკების” მე-7 ნომერი სიმულიანტობაში პრემიერლიგაში ერთ-ერთი საუკეთესო იყო. მოურინიოს “ინტერში” გადასვლის შემდეგ, მისთვის კრიშტიანუ კარგ ფეხბურთელად იქცა, მაგრამ არა საუკეთესოდ – მოურინიო ასეთად თავის იმდროინდელ შეგირდს, ზლატან იბრაჰიმოვიჩს მიიჩნევდა. ახლა კი, ჟოზემ თანამემამულე ვარსკვლავი პელესა და მარადონაზე წინ დააყენა.
