მონღოლი იოკოძუნები ჰაკუჰო და ჰარუმაფუჯი დამაჯერებელ ასპარეზობას განაგრძობენ. კიუშიუ ბაშოს ლიდერებმა მიჯრით მე-10 მოგებები მიითვალეს და ისეთი პირი უჩანს, “იმპერატორის თასის” ბედი მათ უშუალო დაპირისპირებაში გაირკვევა.

თანაბარი ბალანსი – 5 გამარჯვება და 5 წაგება გააჩნია გაგამარუს შიკონათი ცნობილ თეიმურაზ ჯუღელს. შეგახსენებთ, რომ ქართველ სუმოისტს დასავლეთის მე-13 მაეგაშირას წოდება გააჩნია და სატიტულო წინსვლისთვის ნოემბრის სუპერტურნირზე კაჩი-კოში (დადებითი ბალანსი) სჭირდება.

გაგამარუ ამჯერად დასავლეთის მე-11 მაეგაშირა ტამავაშის დაუპირისპირდა და განმეორებით შერკინებაში (ტორი-ნაოსი) მონღოლს ქამარში შესვლის საშუალება მისცა, შესაბამისად, მეტოქის იორიკირის განხორციელება აღარ გასჭირვებია.

გაგამარუს შემდეგი დაპირისპირება აღმოსავლეთის მე-8 მაეგაშირა ტაკარაფუძისთან ელის, რომელთანაც ორივე გასული შერკინება წაგებული აქვს.