სუპერლიგის მონაწილე “სოხუმის” აწ უკვე ყოფილი კალათბურთელი, საქართველოს ეროვნული ნაკრების წევრი ნიკა მეტრეველი (14.01.91, 213სმ), 18 დეკემბერს, გამთენიისას იტალიაში გაემგზავრა.

ამის შესახებ “მსოფლიო სპორტს” “სოხუმის” მთავარმა მწვრთნელმა ვაჟა კვარაცხელიამ განუცხადა.

შეგახსენებთ, რომ მეტრეველი კარიერას იტალიის მე-3 ლიგის გუნდ “როზეტო შარქსში” გააგრძელებს, სადაც 2013-14 წლების სეზონის ბოლომდე დარჩება. ნიკამ აღნიშნული სეზონი სუპერლიგის ერთ-ერთ საუკეთესო გუნდ “სოხუმში” დაიწყო და ზღვისპირელებთან ერთად დუდუ დადიანის მემორიალი მოიგო.

მეტრეველს იტალიის სხვადასხვა ლიგის გუნდებში, მათ შორის ამ ქვეყნის ერთ-ერთ საუკეთესო კლუბ “მონტეპასკისში” აქვს ნათამაშები.