ქართველი კალათბურთელი მანუჩარ მარკოიშვილი მოსკოვის ცსკა-სთან ერთად მე-2 წინასასეზონო შეკრებაზე ბერძნულ ქალაქ კარპენისში გაემგზავრა. რუსულ გრანდს აღნიშნული ადგილი შემთხვევით არ შეურჩევია. კარპენისი ცნობილი ბერძნული სამთო კურორტია, რომელიც ათენიდან 4 საათის სავალზე იმყოფება და საკალათბურთო გუნდები იქაურ ბაზებს არცთუ იშვიათად იყენებენ.

ცსკა-ს ოფიციალური ვებ-გვერდის ცნობით, გუნდი პირველ საკონტროლო მატჩს 10 დღის თავზე ჩაატარებს. 14 სექტემბერს “არმიელები” პატრის “აპოლონს” ეთამაშებიან, 16-ში კი ძალებს ტრიკალას “არისთან” მოსინჯავენ. 18 სექტემბერს “წითელ-ლურჯები” გეზს სალონიკისკენ აიღებენ და მე-2 დღეს მაყურებლებისთვის დახურულ თამაშში თურქულ “ბანვითს” გაეჯიბრებიან. 20-21 სექტემბერს უკვე ნიკოს გალისის სახელობის საერთაშორისო ტურნირი შედგება და ცნობილია, რომ ნახევარფინალში ცსკა-ს მეტოქე ათენის “პანათინაიკოსი” იქნება.

აღნიშნულით, მოსკოველთა ბერძნული ტურნე დასრულდება, რის შემდეგაც ცსკა-ს თურქული ტურნირი და მოსკოვში დაგეგმილი ალექსანდრ გომელსკის სახელობის შეჯიბრი ელით. ამჟამად, რუსულ გრანდს ძირითადი შემადგენლობიდან მხოლოდ მილოშ ტეოდოსიჩი აკლია. მოგეხსენებათ, სერბი მცველი  ეროვნული ნაკრების ღირსებას ესპანეთში მიმდინარე მსოფლიო ჩემპიონატზე იცავს.