ლუსიმარ ფერეირა და სილვა 1978 წლის 8 მაისს დაიბადა. ბრაზილიელი მცველი 2000 წლიდან მოყოლებული ევროპაში ასპარეზობს. გერმანიაში ლუსიომ 4 სეზონი ლევერკუზენში გაატარა (“ბაიერთან” ერთად ჩემპიონთა ლიგის ფინალში ითამაშა), 5 წლის განმავლობაში კი მიუნხენის “ბაიერნის” ღირსებას იცავდა. ბავარიელებთა შორის გამოსვლისას ლუსიომ სამჯერ ბუნდესლიგა და ამდენჯერვე გერმანიის თასი მოიპოვა. 2009 წელს ბრაზილიელმა უკანახაზელმა თავი მილანის “ინტერში” ამოჰყო და მის მიერ მოპოვებულ ჯილდოთა ნუსხა კიდევ უფრო შთამბეჭდავი გახდა – “ნერაძურის” შემადგენლობაში ლუსიომ სკუდეტო, ჩემპიონთა ლიგა, მსოფლიოს საკლუბო პირველობა, იტალიის თასი და სუპერთასი მოიგო. სანაკრებო დონეზე გამოსვლას რაც შეეხება, სელესაოს რიგებში ლუსიო 2002 წელს კორეა-იაპონიაში მსოფლიოს ჩემპიონი გახდა, 2005 და 2009 წლებში კი კონფედერაციათა თასი დაისაკუთრა. აი, ასეთი ქარიზმატული და გამოცდილი ფეხბურთელი დაიმატა ანტონიო კონტემ “იუვენტუსში”. ლუსიო ტურინში 2014 წლის ივნისამდე ითამაშებს. ბრაზილიელ მცველს ინტერვიუ Juventus Channel-მა ჩამოართვა.