თუ ინგლისურ პრესაში გავრცელებულ ინფორმაციას დავუჯერებთ, “ლივერპული” და “არსენალი” “ბარსელონას” შემტევის, პედრო როდრიგესის შეძენით არიან დაინტერესებულნი.

26 წლის ფეხბურთელს ტატა მარტინოს გუნდში შეუცვლელი მოთამაშე ნამდვილად არ ეთქმის. მართალია, მან ლა ლიგაში უკვე 16 თამაში ჩაატარა, მაგრამ აქედან ძირითად შემადგენლობაში 10, ხოლო სრულად – მხოლოდ 5. მიუხედავად ამისა, პედრო “ბარსელონას” საუკეთესო ბომბარდირია. მან ლა ლიგის მიმდინარე გათამაშებაში 10 გოლი გაიტანა.

Daily Express-ის ცნობით, “ლივერპული” და “არსენალი” შეეცდებიან იმით ისარგებლონ, რომ პედრომ ძირითად შემადგენლობაში ადგილი დაკარგა და ესპანელი თავდამსხმელი გადაიბირონ.

პედრო როდრიგესმა “ბარსელონასთან” კონტრაქტი ბოლოს 2011 წელს გაახანგრძლივა. მას კატალონიელებთან ხელშეკრულება 2016 წლამდე აკავშირებს.