დღეს, 9 ივლისს, საქართველოს 18 წლამდელთა ნაკრებმა კალათბურთის აკადემიაში ღია ვარჯიში ჩაატარა. ხვალ კი გამთენიისას ევროპის ჩემპიონატისთვის მოსამზადებელი ციკლის ფარგლებში უცხოურ შეკრებაზე მიემგზავრება. არჩილ ჟღენტის გუნდი ლატვიაში, ფინეთსა და ბულგარეთში მთლიანობაში 6 ამხანაგურ მატჩს გამართავს, რის შემდეგაც პირდაპირ ევროპის ჩემპიონატზე გაემგზავრება.

18 წლამდელთა ნაკრები ლატვიაში ერთკვირიან შეკრებას (10-17 ივლისი) გაივლის. ქართველები ლატვიის 18 წლამდელთა ნაკრებს ერთხელ შეხვდებიან, ადგილობრივი პირველი ლიგის გუნდებთან კი 2 სპარინგ-მატჩს გამართავენ.

17-დან 20 ივლისის ჩათვლით საქართველოს ნაკრები ფინეთში გაივლის შეკრებას, რის ფარგლებშიც ადგილობრივ ნაკრებთან 2 ამხანაგურ მატჩში იასპარეზებს. ფინეთიდან ქართველები ბულგარეთში გადაინაცვლებენ და 21 ივლისს ამ ქვეყნის ნაკრებთან სპარინგ-მატჩს ჩაატარებს.

ევროპის ჩემპიონატი (B დივიზიონი) სწორედ ბულგარეთში, 24 ივლისიდან 3 აგვისტოს ჩათვლით გაიმართება, სადაც საქართველოს ნაკრები D ჯგუფშია ავსტრიასთან, ესტონეთთან, ისლანდიასთან, გერმანიასა და ისრაელთან ერთად. თუ საქართველო საუკეთესო 2 გუნდში მოხვდება, ჯგუფიდან გავა და ბრძოლას A დივიზიონში გადასასვლელად განაგრძობს.

ელიტარული დივიზიონის საგზურს ტურნირის 3 საუკეთესო გუნდი მოიპოვებს.

საქართველოს 18 წლამდელთა ნაკრების შემადგენლობა

ლუკა ზაქრაძე (უკანახაზელი) – ჰიუნდაი

თორნიკე გაგუა (უკანახაზელი) – არმია

ნუგზარ ტაბაღუა (უკანახაზელი) – რუსთავი

გოგი გოგობერიშვილი (უკანახაზელი) – რუსთავი

დავით ლომიძე (ფორვარდი) – მართვე

გიორგი გუგეშაშვილი (ფორვარდი) – შსს-აკადემია

ლევან მასხულია (ფორვარდი) – გრან კანარია, ესპანეთი

სოსო მაჭავარიანი (ფორვარდი) – არმია

ლუკა გიორგაძე (ფორვარდი) – აკადემია

გიორგი ცირეკიძე (ფორვარდი) – რიმინი კრაბს, იტალია

ვასილ კუტალაძე (ცენტრი) – შსს-აკადემია

გიორგი ტურძელაძე (ცენტრი) – რუსთავი

ვილი ისიანი (ცენტრი) – გრან-კანარია, ესპანეთი

მაიზერ რევაზაშვილი (ცენტრი) – მაკაბი

სამწვრთნელო შტაბი

მთავარი მწვრთნელი: არჩილ ჟღენტი

მთავარი მწვრთნელის ასისტენტი: გიორგი ნიკოლაძე

მთავარი მწვრთნელის ასისტენტი: დიმიტრი ჟაკობოვი

ასაკობრივი ნაკრებების კოორდინატორი: გელა წულაძე

მენეჯერი: გიორგი ბუცხრიკიძე

ექიმი: ზურაბ იოსელიანი

კალენდარი. მითითებულია თბილისის დრო

24 ივლისი

საქართველო-ავსტრია 15:45

25 ივლისი

ესტონეთი-საქართველო 13:30

26 ივლისი

ისრაელი-საქართველო 20:15

27 ივლისი

საქართველო-ისლანდია 17:00

28 ივლისი

გერმანია-საქართველო 22:30

გთავაზობთ ინტერვიუს ნაკრების მთავარ მწვრთნელ არჩილ ჟღენტთან.

-       როდის დაიწყეთ ევროპის ჩემპიონატისთვის მზადება და თავიდან გუნდში რამდენი კალათბურთელი გამოიძახეთ?

-       ევროპის ჩემპიონატისთვის მზადება 2 ივნისს დავიწყეთ. გაფართოებულ შემადგენლობაში 19 კალათბურთელი შევიყვანე, რომელიც 14-მდე დავიდა.

-       როდის გახდება ცნობილი იმ 12 კალათბურთელის ვინაობა, რომლებიც B დივიზიონის ევროპის ჩემპიონატზე იასპარეზებენ?

-       იმ 12 კალათბურთელის ვინაობა, რომლებიც ევროპის ჩემპიონატზე იასპარეზებენ, ლატვიური შეკრების დასრულების შემდეგ გახდება ცნობილი. ნაკრებში დარჩენილი სპორტსმენები ევროპის ჩემპიონატისთვის მზადებას გააგრძელებენ, ხოლო ნაკრების მიღმა დარჩენილი ორი სპორტსმენი საქართველოში დაბრუნდება.

-       თუ შეიძლება გვითხარით ამხანაგური შეხვედრების განრიგი.

-       12 ივლისს ჩვენი მეტოქე ლატვიის 18 წლამდელთა ნაკრები იქნება, ხოლო 14 და 16-ში ამ ქვეყნის საკლუბო გუნდებს შევხვდებით, რომელთა ვინაობა ჯერჯერობით უცნობია. ლატვიის შემდეგ ფინეთში გადავინაცვლებთ, სადაც ამ ქვეყნის 18 წლამდელთა ნაკრებს 18-სა და 19 ივლისს დავუპირისპირდებით. ევროპის ჩემპიონატის მასპინძელ ბულგარეთის დედალაქალ სოფიაში 20-ში ჩავფრინდებით. 21-ში კი ამ ქვეყნის 18 წლამდელთა ნაკრებს გავეჯიბრებით.

-       სანაკრებოდ შეგულებული კალათბურთელებიდან გუნდში ყველა გყავთ?

-       დისკვალიფიკაციის გამო ვერ იქნება უკანახაზელი ლევან გოგალაძე (“შსს აკადემია), რომელიც მოედანზე ჩხუბის გამო ერთ სეზონს გამოტოვებს, ტრავმა აწუხებს ფორვარდ დავით ლომიძეს (“მართვე”), მაგრამ ექიმი მაიმედებს, რომ მალე გამოჯანმრთელდება.

-       საქართველოს 20 წლამდელთა ნაკრების მსგავსად, თქვენც ხომ არ გყავთ გუნდში შედარებით ახალგაზრდა კალათბურთელები?

-       5 კალათბურთელი (გოგობერიშვილი, ტურძელაძე, გიორგაძე, კუტალაძე, ლომიძე) 17 წლისაა, ხოლო ერთი – ცირეკიძე – სულაც 16 წლის არის.

-       18 წლამდელთა ნაკრებში შედარებით უმცროსი ასაკის სპორტსმენების გამოძახება რამ განაპირობა?

-       რა თქმა უნდა, ეს ყველაფერი კარგი ცხოვრებით არაა განპირობებული. 18 წლამდელთა შორის იმდენად მცირეა კარგი კალათბურთელების რაოდენობა, რომ იძულებული გავხდი გუნდი უმცროსი ასაკის კალათბურთელებით შემევსო.

-       ჩვენი ჯგუფის მონაწილე გუნდებს თუ იცნობთ? 

-       ყველაზე კარგი გუნდი გერმანიას ჰყავს, ისრაელი საკალათბურთო ქვეყანაა და ყოველთვის ანგარიშგასაწევ ძალად ითვლება. ხელწამოსაკრავი გუნდი არც ავსტრიას, ესტონეთსა და ისლანდიას ეყოლება. ჩვენ ყველაფერს გავაკეთებთ, რომ ჯგუფიდან გავიდეთ. დანარჩენს მომავალი გვიჩვენებს.