ევრობასკეტ 2013-ზე მეორე ეტაპის ბოლო ტურის მატჩები გაიმართა და მეოთხედფინალისტები E ჯგუფში დაკავებული ადგილების მიხედვით განაწილდნენ. მესამე ტურის მატჩებში, ინტრიგას მხოლოდ ლატვია ტოვებდა. თუ უკრაინა ლიტვასთან წააგებდა და ლატვია ბელგიას მოუგებდა, შემდეგ ეტაპზე ბალტიისპირელები გადიოდნენ. სცენარი სხვაგვარად განვითარდა: უკრაინამ წააგო და მეოთხედფინალში გავიდა, რადგან ბაგადსკისის შეგირდებმა, ბელგიის გატეხვა ვერ მოახერხეს.

E ჯგუფი

ლუბლიანა. "სტოჟიცე-არენა". 3 270 მაყურებელი

ლატვია _ ბელგია 56:60 (15:14, 17:18, 10:14, 14:14)

მესამე ტურის პირველი თამაში ლატვიასა და ბელგიას შორის ჩატარდა. მეოთხედფინალში გასასვლელად, ბალტიისპირელებს მხოლოდ მოგება ესაჭიროებოდათ და შემდეგ ლიტველთა იმედზე რჩებოდნენ. შეხვედრის პირველი ტაიმი ფრედ დამთავრდა. ორივე გუნდი ჩაკეტილ დაცვას თამაშობდა. მესამე მეოთხედში ბელგია უკეთესად გამოიყურებოდა და 10-წუთეული 4 ქულის სხვაობით მოიგო. გადამწყვეტ მეოთხედი, ბაგადსკისის შეგირდებმა ცუდად დაიწყეს. ერთი პერიოდი, 9 ქულითაც აგებდნენ. უკანასკნელი მეოთხედის ბოლო, მერვე წამზე, მასოტომ ორქულიანი ჩააგდო და ბელგია სამი ქულით გაიყვანა წინ (56:59). საპასუხო შეტევის დროს ბერტანსმა სამქულიანი ტყორცნა ააცილა, მოხსნაზე კი მუკუბუმ იყოჩაღა. ბელგიის ნაკრებმა ევროპირველობა გამარჯვებით დაასრულა, ჯგუფი _ მეხუთე ადგილით. ლატვიელები კი ბოლო ადგილს დასჯერდნენ.

ლატვია: ფრეიმანისი (10ქ. 11მ), კუკსიქსი (9ქ. 4მ), სტრელნიეკქი (7ქ. 1მ. 4პ).

მწვრთნელი: აინარს ბაგადსკისი

ბელგია: მასოტი (14ქ. 4მ. 1პ), მუკუბუ (13ქ. 4მ), ჰერველე (10ქ. 7მ. 1პ).

მწვრთნელი: ედი კასტელსი

ლუბლიანა. "სტოჟიცე-არენა". 4 400 მაყურებელი

უკრაინა _ ლიტვა 63:70 (13:18, 17:14, 16:16, 17:12)

უკრაინასა და ლიტვას შორის შეხვედრამ ჯგუფში, პრაქტიკული მნიშვნელობით, ინტერესი დაკარგა. ფრატელოს შეგირდებს მეოთხედფინალი უკვე განაღდებული ჰქონდათ. მატჩი თანაბარ ბრძოლაში წარიმართა. გადამწყვეტი, ბოლო მეოთხედი, ბალტიისპირელებმა შავიზღვისპირელებს 5 ქულით მოუგეს, მატჩი კი 7 ქულის სხვაობით დაამთავრეს. ურთიერთშეხვედრებში ლიტვა დაწინაურდა და 3:2 იგებს.

ამ გამარჯვებით, კაზლაუსკასის შეგირდებს 4 მოგება და 1 წაგება დაუგროვდათ და ჯგუფში მეორე ადგილი დაიკავეს. 

უკრაინა: გლადირი (18ქ. 5მ. 2პ), იეტერი (10ქ. 8პ), კორნიენკო (9ქ. 8მ. 3პ).

მწვრთნელი: მიკ ფრატელო

ლიტვა: კლეიზა (15ქ. 5მ), მოტიეიუნასი (10ქ. 4მ. 1პ), სეიბუტისი (7ქ. 2მ. 4პ)

მწვრთნელი: იონას კაზლაუსკასი

ლუბლიანა. "სტოჟიცე-არენა". 4 380 მაყურებელი

სერბეთი _ საფრანგეთი 77:65 (19:17, 19:14, 22:20, 17:14)

წინა ევროპირველობაზე, სერბეთსა და საფრანგეთს შორის გამარჯვებულის გამოსავლენად ოვერტაიმი დაინიშნა და მაშინ, საფრანგეთმა ერთი ქულით მოიგო. ამჯერად, ივკოვიჩის შეგირდებმა ფრანგებს დამაჯერებლად მოუგეს _ ბალკანელებს ერთი მეოთხედიც კი არ დაუთმიათ. შეიძლება ითქვას, სერბებს ბატუმის, დიავუს, აჯინკას, დე კოლოსა და პარკერის ხუთეული ეთამაშა. მატჩის საუკეთესო მოთამაშედ ნენად კრსტიჩი დაასახელეს. სერბმა 19 ქულა 4 მოხსნა და 4 პასი მიითვალა.

ამ გამარჯვებით, სერბეთმა ჯგუფში პირველი ადგილი დაიკავა, ხოლო საფრანგეთი მესამე პოზიციაზე აღმოჩნდა.  

სერბეთი: კრსტიჩი (19ქ, 4მ. 4პ), ნედოვიჩი (17ქ. 3მ. 1), ბოგდანოვიჩი (14ქ. 5მ. 2პ), სტიმაჩი (8ქ. 6მ), გაგიჩი (8ქ. 5მ).

მწვრთნელი: დუშან ივკოვიჩი

საფრანგეთი: ბატუმი (12ქ. 7მ. 2პ), დიავუ (12ქ. 5მ. 1პ), აჯინკა (12ქ. 4მ. 2პ), დე კოლო (12ქ. 2მ), პარკერი (10ქ. 5პ).

მწვრთნელი: ვინსენტ კოლეტი

E ჯგუფი     

1. სერბეთი          5   4/1   371/343   7

2. ლიტვა             5   4/1   355/314   7

3. საფრანგეთი   5   3/2   388/380   7

4. უკრაინა           5   2/3   325/364   6

5. ბელგია            5   1/4   318/358   5

6. ლატვია           5   1/4   362/360   4

დღეს, F ჯგუფის სამი შეხვედრა გაიმართება: საბერძნეთს გადამწყვეტი მატჩი ელოდება ხორვატიის ეროვნულ ნაკრებთან, მასპინძელი სლოვენია ფინეთს ეთამაშება, ხოლო ესპანეთი იტალიის ნაკრებთან გაარკვევს ურთიერთობას.

გიორგი ბალახაძე

ევრობასკეტ-2013-ს წარმოგიდგენთ ონლაინ-ტოტალიზატორი TBILISIBET.COM და სპორტული ეკიპირების ესპანური ბრენდი Joma