ჯეისონ კიდს სახელოვანი კალათბურთელის კარიერა კი ჰქონდა, თუმცა, მწვრთნელის რანგში ძალიან “მძიმედ” დაიწყო. მისმა დარიგებულმა “ბრუკლინ ნეთსმა”, რომლის ღირსებას საქართველოს ეროვნული ნაკრების ფორვარდი თორნიკე შენგელიაც იცავს, საზაფხულო ლიგაში მე-3 მატჩი ჩაატარა და კვლავ მარცხი განიცადა.

“ნეთსი” ამჯერად “იუტა ჯაზს” დაუპირისპირდა და დიდი ანგარიშით – 69:98 დამარცხდა. შენგელია ისევ სასტარტო ხუთეულში იყო, თუმცა, შედარებით ნაკლები დრო – 17:47 წუთი დაუთმეს. აღნიშნულის მიზეზი 5 პერსონალური ფოლი გახდა. კიდმა თორნიკე მე-3 მეოთხედის შუაწელს შეცვალა და მოედანზე აღარც გამოუყვანია.

ქართველმა კალათბურთელმა 4-დან 1 ორქულიანი, 1 სამქულიანი და 2 საჯარიმო ჩააგდო, 7 ქულას კი 5 მოხსნა, 3 პასი და 2 ჩაჭრა წაამატა. შენგელიამ ბურთი 4-ჯერ დაკარგა და ერთხელაც დაუფარეს.

“ბრუკლინი” ორლანდოში მიმდინარე საზაფხულო ლიგაზე მომდევნო მატჩს 11 ივლისს “ჰიუსტონ როკეტსის” წინააღმდეგ ჩაატარებს. შეხვედრა თბილისის დროით 23:00 საათზე დაიწყება.