საქართველოს ეროვნული გუნდის მეორე გამარჯვება მაკედონიაში. ქალაქ ოჰრიდში მიმდინარე საერთაშორისო ტურნირზე იგორ კოკოშკოვის გუნდმა ავსტრია დაძაბულ ბრძოლაში, დამატებით დროში – 78:74 დაამარცხა.

ტურნირის პირველ დღეს ქართველმა კალათბურთელებმა რუმინელებს აჯობეს, დასკვნით მატჩში კი, ფინალის ტოლფას თამაშში მასპინძელთა ნაკრებს შეხვდებიან. მაკედონიასთან გამარჯვების შემთხვევაში, კოკოშკოვის გუნდი ოჰრიდის ტურნირის მთავარ ტიტულს დაეპატრონება.

ავსტრიასთან მატჩი რთული გამოდგა ქართველებისთვის. მიუხედავად იმისა, რომ მატჩი მოსამზადებელ ხასიათს ატარებდა, შეხვედრა ისე წარიმართა, გამარჯვებას პრინციპული მნიშვნელობა მიეცა. ძირითადი დროის ბოლოს ანგარიშში სხვაობა მინიმალური იყო და შეხვედრაც ოვერტაიმში გადაიზარდა. დამატებით დროში კი წაგებას სულ სხვა, მწარე გემო აქვს და გუნდებმაც მოსაგებად ყველაფერი გაიღეს.

დამატებით დროში ქართველები 4 ქულით ჩამორჩნენ, თუმცა გუნდის კაპიტნის, ზაზა ფაჩულიას, ნიკა მეტრეველის და ვიქტორ სანიკიძის შედეგიანი თამაშის წყალობით, საქართველომ დამსახურებული გამარჯვება მოიპოვა. დამატებითი დროის დასრულებამდე 1 წუთით ადრე ფაჩულიამ 2-ქულიანი და პლუს საჯარიმო ჩააგდო, რითაც ქართველები 76:74 დააწინაურა. ჩვენი ნაკრების კაპიტანმა საჯარიმოს ხაზიდან მიითვალა მატჩის ბოლო ქულებიც, რითაც იგორ კოკოშკოვის გუნდს გამარჯვება გაუნაღდა.

ზოგადად, მატჩი ავსტრიელთა ლიდერობით მიმდინარეობდა. ქართველებმა პირველი მეოთხედის ბოლოს მცირე უპირატესობა მოიპოვეს, თუმცა ავსტრიელებმა მალევე დაიბრუნეს ლიდერობა, რომელსაც მატჩის ბოლო წუთებამდე ინარჩუნებდნენ. ავსტრიელთა უპირატესობამ მესამე მეოთხედის დასაწყისში 11 ქულასაც მიაღწია, თუმცა ქართველებმა მეთოდურად იწყეს ვითარების გამოსწორება და ძირითადი დროის დასრულებამდე 3 წუთით ადრე, ფაჩულიას ორქულიანმა საქართველოს პირველ ათწუთეულში დაკარგული ლიდერობა დაუბრუნა.

პირველ მატჩთან შედარებით, ამჯერად უფრო მეტად დაიტვირთნენ სასტარტო  ხუთეულის კალათბურთელები, ხოლო სათადარიგოთაგან ყველაზე მეტი (15 წ.) ბესო ლეჟავამ ითამაშა. მოედანზე არ გასულან განაცხადში მყოფი მიხეილ ბერიშვილი და მიხეილ ჭოჭუა, ხოლო აკაკი დვალიშვილმა (3 წუთი), გიორგი შარაბიძემ (8 წუთი) და ბექა წივწივაძემ (9 წუთი) ჯამში 20 წუთი ითამაშეს.

18 ივლისს, საქართველოს ეროვნული ნაკრები მაკედონიას შეხვდება და ამ მატჩის მოგებული ოჰრიდის ტურნირის გამარჯვებული გახდება. შეხვედრა თბილისის დროით 22:30 საათზე დაიწყება.

ოჰრიდის საერთაშორისო ტურნირი. მაკედონია. 17 ივლისი

საქართველო – ავსტრია 78:74 დ.დ. (15:16, 16:24, 19:13, 14:11, 14:10)

საქართველო: ცინცაძე (36 წ. 10 ქ. 4 პ.), ფაცაცია (27 წ. 3 ქ. 4 მ.), სანიკიძე (39 წ. 15 ქ. 9 მ. 3 პ.), მეტრეველი (39 წ. 20 ქ.), ფაჩულია (38 წ. 17 ქ. 9 მ. 4 პ.); შარაბიძე (8 წ. 2 ქ.), დვალიშვილი (3 წ.), სანაძე (12 წ. 3 ქ.), ლეჟავა (15 წ. 8 ქ.), წივწივაძე (9 წ.).

www.gbf.ge