ბილბაოს “ატლეტიკის” თავდამსხმელი იკერ მუნიაინი ტურინის “იუვენტუსის” ინტერესთა სფეროში მოექცა.
El Mundo Deportivo კვირის დასაწყისში უკვე იუწყებოდა, რომ “ბებერი ქალბატონის” წარმომადგენლები 20 წლის ფეხბურთელს აკვირდებიან, ახლა კი, Football Italia-ს ცნობით, ტურინელები შეთანხმების გაფორმებას უკვე იანვრის სატრანსფერო პერიოდში შეეცდებიან.
“იუვენტუსის” ხელმძღვანელობას არც იმ თანხის სიდიდე აშინებს, რაც მუნიაინის კონტრაქტში გამოსასყიდის სახითაა მითითებული - 38 მილიონი ევრო. წყაროს ინფორმაციით, იკერთან მოლაპარაკებისას იტალიელები მისი ყოფილი თანაგუნდელის, ფერნანდო ლიორენტეს ამოქმედებას აპირებენ.
პრიმერა დივიზიონის მიმდინარე სეზონში, მუნიაინმა “ბილბაოს” მაისურით 14 მატჩში მიიღო მონაწილეობა, 3 გოლი გაიტანა და ორი შედეგიანი გადაცემა გააკეთა.
