კატალონიური “ბარსელონას” ნახევარმცველმა ანდრეს ინიესტამ განაცხადა, რომ მზადაა კლუბთან თანამშრომლობა მომავალშიც გააგრძელოს.
Football Espana-ს ცნობით, 29 წლის ფეხბურთელს კატალონიელებთან მოქმედი კონტრაქტის ვადა 2015 წლის ზაფხულში ეწურება, თუმცა კლუბის ხელმძღვანელობა მზადაა გუნდის ერთ-ერთ ლიდერს ხელშეკრულება დღესვე გაუხანგრძლივოს.
“არაერთხელ მითქვამს, რომ ახალი კონტრაქტის გაფორმება მხოლოდ დროის ამბავია. “ბარსელონაში” დარჩენა მსურს და კლუბთან ახალ შეთანხმებას აუცილებლად გავაფორმებ. ხელმძღვანელობასაც სურს, რომ დავრჩე და ძალიან კარგია ჩვენი სურვილები რომ ემთხვევა. “ბარსელონას” გარდა არაფერზე ვფიქრობ. სხვა ვარიანტები რომ მქონოდა, ამის შესახებ ყველას ყველაფერი ეცოდინებოდა” - თქვა ინიესტამ.
