ცნობილმა ინგლისურმა გამოცემამ, Guardian-მა, 2013 წლის საუკეთესო ფეხბურთელად “ბარსელონასა” და არგენტინის ეროვნული ნაკრების ლიდერი ლიონელ მესი დაასახელა.

ინგლისურმა გამოცემამ ფეხბურთის 15 ექსპერტი გამოკითხა და 2013 წლის მსოფლიოს 100 საუკეთესო ფეხბურთელის სია შეადგინა. ექსპერტთაგან 12 Guardian-ის სპორტული ჟურნალისტია, ხოლო დანრაჩენი 3 – მოწვეული ექსპერტი. მოწვეული ექსპერტები არიან ყოფილი იტალიელი მცველი ალესანდრო ნესტა, ინგლისის ქალთა ნაკრების ყოფილი მწვრთნელი ჰოუპ პაუელი და ყოფილი ამერიკელი მეკარე კეისი კელერი.

ისევე, როგორც გასულ წელს, Guardian-ის ვერსიით საუკეთესო ფეხბურთელის წოდება ლიონელ მესიმ მოიპოვა. არგენტინელ ვარსკვლავს კვლავ კრიშტიანუ რონალდუ მოსდევს. ათეულში შევიდნენ ზლატან იბრაჰიმოვიჩი, ფრანკ რიბერი, ანდრეს ინიესტა, ნეიმარი, გარეთ ბეილი, ჩავი ერნანდესი, ლუის სუარესი და სერხიო აგუერო.