სპლიტის “ჰაიდუკმა” ქართველი თავდამსხმელი გიორგი ილურიძე ოფიციალურად წარადგინა. ამის შესახებ საფეხბურთო კლუბ “ჰაიდუკის” ვებგვერდი იუწყება.

ხორვატულ კლუბში ილურიძე 11-ნომრიანი მაისურით ითამაშებს. მასთან ერთად “ჰაიდუკმა” კიდევ ერთი ახალწვეული ჰარის ბუკვა წარადგინა, რომელსაც 21-ნომრიანი მაისური გადასცეს. ცერემონიას კლუბის სპორტული დირექტორი იენს ანდერსონი უძვებოდა, რომელმაც შესავალ სიტყვაში ფეხბურთელები შეაქო.   

წარდგენის შემდეგ, 21 წლის ილურიძემ ჟურნალისტების შეკითხვებს უპასუხა და ევროპის ლიგის მე-3 ეტაპზე, სპლიტში “ჰაიდუკთან” გატანილი გოლისთვის მოიბოდიშა, რამაც დარბაზში მყოფნი გაამხიარულა:

“ჰაიდუკთან” რთული მატჩი იყო და ნორმალურად ვითამაშე. “ჰაიდუკი” კარგი გუნდია. მე გოლი გავიტანე და ამისთვის ბოდიშს ვიხდი”.

ერთ-ერთმა ჟურნალისტმა ილურიძეს ჰკითხა თუ რამდენად შეესაბამებოდა სიმართლეს ინფორმაცია, რომ მას ვენის “რაპიდი” იწვევდა, რაზეც ქართველმა შემდეგი უპასუხა:

“როგორც ვიცი, “რაპიდთან” თამაშის მერე, ავსტრიელების მწვრთნელი ჩვენი კლუბის წარმომადგენლებს ელაპარაკა. თუმცა, “ჰაიდუკთან” მატჩის შემდეგ, კლუბის სპორტულ დირექტორთან უკვე ნასაუბრები მქონდა და ამიტომ, “რაპიდს” უარი ვუთხარი”.

ქართველ თავდამსხმელს “ჰაიდუკის” დახასიათებაც სთხოვეს.

“ჰაიდუკი” კარგი გუნდია – ახალგაზრდა, ტექნიკური, შემტევ ფეხბურთს თამაშობს. ასეთი გუნდები მომწონს. ჩემი აზრით, ამ სეზონში “ჰაიდუკი” ჩემპიონი გახდება”.