აგდამის “ყარაბაღის” თავდამსხმელი ნიკოლოზ გელაშვილის აზერბაიჯანის პრემიერლიგის მეორე ნახევარში 10 გოლის გატანას გეგმავს. ამის შესახებ თურქეთში შეკრებაზე მყოფმა ქართველმა თავდამსხმელმა ინტერნეტგამოცემა azerisport.com-თან ინტერვიუში განაცხადა.  

- ვარჯიში ხომ არ გიძნელდებათ?

- ვერ ვიტყოდი. საერთო ჯამში, კარგი განწყობით ვემზადებით. ჩვენ კონკრეტული ამოცანები დავისახეთ და ის ტემპი უნდა შევინარჩუნოთ, რომელიც სეზონის პირველ ნახევარში ავიღეთ.

- პრემიერლიგის ლიდერის რანგში მზადება სასიამოვნოა?

- დიახ, მაგრამ უფრო სასიამოვნო ჩემპიონობა იქნება.

-წინ ოთხი საკონტროლო მატჩი გელით. თქვენთვის ისინი რას ნიშნავს?

- ჩემთვის და მთელი გუნდისთვის ისინი მნიშვნელოვანია. მოედანზე ურთიერთგაგება უნდა გავაუმჯობესოთ.

- თქვენ კი გოლების გატანა უნდა დაიწყოთ?

- ამ საკონტროლო მატჩებში რაც მეტს გავიტან, მით უკეთესია. საერთოდ კი, არა ჩემი გოლებია მნიშვნელოვანი, არამედ, მეტოქეების დამარცხება.

- სეზონის პირველ ნახევარში საკუთარ თამაშს როგორ შეაფასებთ?

- უკეთესად თამაში და 2-3 გოლით მეტის გატანა შემეძლო. მე ხომ ვიცი, რომ ეს ჩემი ზღვარი არაა.

- სეზონის მეორე ნახევარში “ყარაბაღისგან” რას უნდა ველოდოთ?

- ქვეყნის ჩემპიონატში გამარჯვებას. სერიოზული კონკურენტები გვყავს “გაბალას”, “ნეფთჩის”, “ბაქისა” და “ინტერის” სახით, მაგრამ ეს ჩემპიონობის მომდევნო სეზონისთვის გადადების მიზეზი არ უნდა გახდეს.

- “მდევრებიდან” ყველაზე სახიფათოდ ვის მიიჩნევთ?

- მართალი გითხრათ, ვინმეს გამორჩევა გამიჭირდება. გადამწყვეტ მომენტში, ჩამოთვლილი გუნდებიდან “გასროლა” ნებისმიერს შეუძლია.

- სეზონის მეორე ნახევარში რამდენი გოლის გატანას გეგმავთ?

- რაც მეტი, მით უკეთესი. კონკრეტულად, 10 გოლის გატანა მაინც მინდა. ვფიქრობ, ეს 10 გოლი და პლუს პარტნიორების ზუსტი დარტყმები, ჩემპიონის ტიტულს მოგვიტანს.