71 წლის ასაკში გარდაიცვალა ლეგენდარული პორტუგალიელი ფეხბურთელი ეუსებიო. პორტუგალიის ყველა დროის საუკეთესო თავდამსხმელს გულის პრობლემები ჰქონდა, ოპერაციაც გაიკეთა, თუმცა ამჯერად უკვე ვეღარაფერმა უშველა.

მოზამბიკური წარმოშობის ეუსებიოს ორი მეტსახელი ჰქონდა: “შავი პანტერა” და “შავი მარგალიტი”. მან კარიერის ბოლოს რამდენიმე კლუბში ითამაშა, თუმცა მაინც შეიძლება ითქვას, რომ “ბენფიკაში” გაატარა თითქმის მთელი კარიერა – 15 წელი. შედეგიანობა, უბრალოდ, არანორმალურია: “ბენფიკაში” 301 მატჩში 317 გოლი მიითვალა.

ეუსებიოს პორტუგალიის ნაკრებში 64 მატჩი ჩაუტარებია და 41 გოლი გაუტანია. ფანტასტიკურად ითამაშა 1966 წლის მსოფლიოს ჩემპიონატზე, სადაც საუკეთესო ბომბარდირი გახდა 9 გატანილი ბურთით, ხოლო პორტუგალია მესამე ადგილზე გავიდა. 

ტიტულები:  პორტუგალიის 11-გზის ჩემპიონი, თასის 5-გზის მფლობელი, ჩემპიონთა თასის მფლობელი 1961 და 1962 წლებში, ფინალისტი 1963, 1965 და 1968 წლებში. ოქროს ბურთის მფლობელი 1965 წელს, პორტუგალიის ჩემპიონატის 7-გზის საუკეთესო ბომბარდირი, “ოქროს ბუცის” მფლობელი 1968 და 1973 წლებში.

კიდევ არაერთი ინდივიდუალური ტიტულია ეუსებიოს აქტივში. ამასთან, “შავი პანტერა” World soccer-ის ვერსიით, მე-20 საუკუნის საუკეთესო ფეხბურთელთა შორის მეათე ადგილზეა.

მსოფლიო ფეხბურთმა, ეუსებიოს სახით დიდი დანაკლისი განიცადა. ის არ გახლდათ რთული და კონფლიქტური პიროვნება, ყველას უყვარდა და დიდ პატივს სცემდნენ.