გამარჯვების აღსანიშნავად, ანდა პირიქით, განგებისათვის გამარჯვებების სავედრებლად ცხვრის ან რაიმე ცხოველის შეწირვა არაერთ ქვეყანაში მომხდარა და თავის დროზე თბილისის “დინამოს” ფეხბურთელებმაც კი გამოღადრეს საბრალო ცხვარს კისერი დიღმის საწვრთნელ ბაზაზე – აქაოდა, ახლა მაინც გაგვიმართლებსო.

თუმცა, ეგვიპტეში როგორც ჩანს უფრო შორსაც წავიდნენ. ეგვიპტის ერთ-ერთი დაბალი ლიგის საფეხბურთო კლუბის ფეხბურთელებმა ცხვრის, ქათმის, ხბოს ან რაიმე ეგეთი სულიერის შეწირვა არად ჩააგდეს და მოგებების იმედად ცისქვეშეთის გამგებელს არც მეტი, არც ნაკლები - აქლემი შესწირეს!

დაკლული აქლემის ხორცი ფეხბურთელებმა თურმე იქვე გაინაწილეს და სახლში წააცუნცულეს. ამ ფაქტის შესახებ ერთ-ერთი ინგლისელი მიმოხილველი ირონიით წერს: ”ხორცი ფეხბურთელებმა წაიღეს, კეთილ სულებს კი მხოლოდ ტყავი დაუტოვეს. განა საკმარისია მხოლოდ აქლემის ტყავი გამარჯვევების მოსაპოვებლად?”...