მსოფლიო რეიტინგსიის მეხუთე ნომერმა დავიდ ფერერმა ბუენოს აირესის ტურნირზე საჩემპიონო ტიტულის დაცვა წარმატებით დაიწყო. 31 წლის ესპანელმა არგენტინის დედაქალაქის შეჯიბრების პირველ წრეში ერთი წლით უმცროს კორტის მასპინძელ მაკსიმო გონსალესს 7:6, 6:4 მოუგო. მეორე წრეში ფერერი კოლუმბიელ სანტიაგო ხირალდოს შეხვდება.

კლასიფიკაციიაში 160-ე საფეხურზე მყოფი გონსალესის დამარცხებას ფერერმა 2 საათი მოანდომა. დავიდი მატჩის საკვანძო მომენტებში მეტოქეზე უკეთ გამოიყურებოდა, თუმცა, მთლიანობაში მატჩი დაძაბული გამოდგა. ფერერის აქტივში 4 ბრეიკი და ერთადერთი ეისია.

ბუენოს აირესის ტურნირის სხვა შეხვედრებს რაც შეეხება, 29 წლის არგენტინელმა ხუან მონაკომ (რეიტინგის 42-ე ნომერი) საპირველწრეო ბარიერი ვერ გადალახა – კლასიფიკაციის 92-ე საფეხურზე მყოფ ესპანელ ალბერტ რამოსთან 7:6, 4:6, 2:6 დამარცხდა. მომდევნო სტადიაზე გავიდნენ ევროპელები, რობინ ჰაასე და ფაბიო ფონინი. 26 წლის ჰოლანდიელმა არგენტინელ მარტინ ალუნდს 6:4, 6:7, 6:3 სძლია, რეიტინგის 14-ე ნომერმა იტალიელმა კი გერმანელ იულიან რაისტერს 2 სეტით, 7:5, 6:2 მოუგო.