3 ივლისს, თბილისის დროით 20:00 საათზე, საჩხერის "ჩიხურა" ევროპის ლიგის I საკვალიფიკაციო  ეტაპის I მატჩს გამართავს მაკედონიის დედაქალაქ სკოპიეში, ფილიპ II-ს სტადიონზე - 33 000 მაყურებელს იტევს და მაკედონიის უპირველესი სარბიელია. იქ თამაშობს ეროვნული ნაკრებიც. მეტოქე მაკედონიის "ტურნოვოა", რომელიც ქვეყნის ჩემპიონატში მეორე ადგილზე გავიდა.

სხვათა შორის, "ტურნოვო", "ჩიხურას" მსგავსად, შარშან ისტორიაში პირველად გავიდა ევროტურნირებზე. ორივემ გადალახა პირველი ეტაპი და II ეტაპზე უკვე გავარდა: "ჩიხურა" შვეიცარიის "თუნთან" (0:2, 1:3), "ტურნოვო" კი ხორვატულ "ჰაიდუკთან" (1;2, 1:1). იმ "ჰაიდუკთან", რომელიც III ეტაპზე გორის "დილამ" გამოთიშა (1:0, 1:0).

"ტურნოვოს" მაკედონიის ნაკრების ყოფილი ფეხბურთელი გოჩე სედლოსკი წვრთნის. გუნდში 4 ბულგარელი ლეგიონერია, დანარჩენები კი ადგილობრივი ფეხბურთელები არიან. 22 წლის ნახევარმცველი ბოიან ნაიდენოვი – ერთადერთი ფეხბურთელი, რომელსაც მაკედონიის ნაკრებში იწვევენ, თუმცა იქ მხოლოდ 2 მატჩი აქვს ჩატარებული.

მსაჯები უნგრელები იქნებიან. მთავარი არბიტრი – ადამ ნემეტი.

გოჩე სედლოსკი ("ტურნოვოს" მწვრთნელი): "მე უფრო ჩემს გუნდზე ვფიქრობ, ვიდრე მეტოქეზე. კარგად მოვემზადოთ. შემტევ ფეხბურთს ვითამაშებთ, მოგება გვჭირდება. "ჩიხურაზე" კი რაც შემიძლია ვთქვა, შეთამაშებული გუნდი უნდა იყოს, რადგან ფეხბურთელთა ბირთვი დიდად არ შეცვლილა. ვისურვებდი, რომ გოლი არ გავუშვათ. 1:0-იც არ იქნება ურიგო შედეგი, თუმცა 2:0 უკეთესია". 

"ჩიხურას" რაც შეეხება, კლუბს I ეტაპისთვის ეს ფეხბურთელები ჰყავს უეფას განაცხადში:

მეკარეები: გიორგი სომხიშვილი, ზურაბ მწყერაშვილი, მაქსიმე ქვილითაია

მცველები: ლაშა ჭელიძე, შოთა კაშია, გიორგი რეხვიაშვილი, დავით ოდიკაძე, ზაზა ნადირაძე, ლაშა ჩიკვაიძე.

ნახევარმცველები: გიორგი კორიფაძე, გიორქი ქიმაძე, ლევან ხმალაძე, გიორგი დათუნაიშვილი, ალექსანდრე ივანიშვილი, გიგა იაკობაშვილი, გიგა ბეჭვაია.

თავდამსხმელები: გიორგი გაბედავა, ლაშა კუჭუხიძე, თორნიკე მუმლაძე, ბესიკ დეკანოიძე, თემურ ნადირაძე.

28 ივნისს სოსო ფრუიძის გუნდმა ამხანაგური მატჩი წააგო ცხინვალის "სპარტაკთან" – 0:1.

და შეგახსენებთ, რომ თუ "ჩიხურა" მაკედონიურ კლუბს გამოთიშავს, II ეტაპზე თურქულ "ბურსასფორს" დაუპირისპირდება.