2015 წლის ევროპის ჩემპიონატის შესარჩევ ციკლში საქართველოს ეროვნული გუნდის უმთავრესმა მეტოქე – ჩეხეთის ნაკრებმა პოლონეთში 2 საკონტროლო მატჩი ჩაატარა და თითო მოგება-წაგება მიითვალა.

ჩეხებს ამჯერადაც აკლდნენ უმთავრესი ლიდერები – ტომაშ სატორანსკი და იან ვესელი, თუმცა, ისიც აღსანიშნავია, რომ წამყვანი კალათბურთელების გარეშე ითამაშეს პოლონელებმაც. მათ მარჩინ გორტატი და მაჩიეი ლამპე ვერ ეხმარებოდნენ.

პირველ შეხვედრაში გამარჯვება სტუმრებს დარჩათ. რონენ გინზბურგის შეგირდებმა 70:65 მოიგეს, რაშიც დიდი წვლილი კამილ სვრდლიკმა დაიდო. მის ანგარიშზე 19 ქულა და 8 მოხსნაა. 10-ქულიან ზღვარს მაირჰიდ კორიმ (11) და ირჟი ველშმაც (10) უწიეს.

აქვე ვთქვათ, რომ კორი იამაიკაში გახლავთ დაბადებული, თუმცა, კანადის მოქალაქეა და როგორც სჩანს, მომავალ შესარჩევ ციკლში ჩეხების ნატურალიზებული მოთამაშე იქნება. ცნობისთვის, 31 წლის ფორვარდი ჩეხურსავე “პარდუბიცეში” ირიცხება.

იგი შედეგიანი გახლდათ მე-2 პოლინურ-ჩეხურ დაპურისპირებაშიც, რომელშიც მასპინძლებმა რევანშის აღება მოახერხეს. ამჯერად, კორიმ 12 ქულა მიითვალა და აქტივში 7 მოხსნაც ჰქონდა. მის გარდა, გამოსარჩევია პაველ პუმპრლას (15), პატრიკ აუდას (11) და ონდრეი ბალვინის (11) გარჯაც.

საინტერესოა, რომ ამ მატჩში ჩეხები 22 ქულითაც კი აგებდნენ, თუმცა, მე-2 ტაიმში ყოჩაღად ითამაშეს და კინაღამ შეუძლებელი შესძლეს – თამაში მხოლოდ 2 ქულა დათმეს.

23-26 ივლისს ჩეხეთის ნაკრებს მორიგი სპარინგები ელის. გინზბურგის გუნდის მეტოქეები ისრაელის ნაკრები და რუსეთის პირველი და მეორე გუნდები იქნებიან. აღსანიშნავია, რომ თავდაპირველი გეგმით, ეს მატჩები ისრაელში უნდა ჩატარებულიყო, თუმცა, იქ მიმდინარე საომარი ქმედებების გამო, “ოთხთა ტურნირი” რუსეთის ქალაქ ნოვოგორსკში იქნა გადატანილი.

ისიც ვთქვათ, რომ  2 და 3 აგვისტოს ჩეხ კალათბურთელებს უკვე შინაურ ნიმბურკში ორ საკონტროლო თამაში ელით ჰოლანდიელებთან.

შეგახსენებთ, რომ 2015 წლის ევროპირველობის შესარჩევ ციკლში E ჯგუფის მატჩები 10 აგვისტოს სწორედ საქართველოს და ჩეხეთის თბილისური დაპირისპირებით გაიხსნება, საპასუხო შეხვედრა კი 20 აგვისტოს შედგება.

პირველი მატჩის სტატისტიკა

http://www.pzkosz.pl/m/upload/polcze1.pdf 

მეორე მატჩის სტატისტიკა

http://www.pzkosz.pl/m/upload/polcze2.pdf