გიორგი ჭანტურიამ მეორე ტაიმი ითამაშა “კლუჟისა” და “სტიაუას” შეხვედრაში. “კლუჟის” მწვრთნელი მირიუტა მატჩამდეც ამბობდა, რომ ქართველს სანაკრებო თამაში რადგან ჰქონდა, სრულად დასვენებული ვერ იქნებოდა და 90 წუთს არ დაუთმობდა. “კლუჟმა” 0:1 წააგო – 84-ე წუთზე გაუშვა გოლი. ბუქარესტელები უფრო მეტს უტევდნენ და ჭანტურიასაც იშვიათად ეძლეოდა გამწვავების შანსი. “კლუჟი” მეშვიდე ადგილზეა.

ესტონეთში მეორე ტური გაიმართა და “ფლორას” ზაქარია ბეგლარიშვილმა “პაიდეს” განადგურებას (5:0) დაუდო სათავე. ბეგლარიშვილმა 21-ე წუთზე გახსნა ანგარიში.

პოლონეთში “იაგელონიამ” შინ 1:0 სძლია ‘ზაგლებიეს” და მერვე პოზიციაზეა. ქართველებს არ უთამაშიათ: გიორგი ფოფხაძე განაცხადში არ გახლდათ, ხოლო ნიკა ძალამიძე 18 კაცს შორის იყო, თუმცა მინდორზე არ შეუყვანიათ.

დანიაში “ორჰუსმა” შინ 2:5 წააგო “ოლბორგთან”. ქართველთაგან მხოლოდ დავით დევდარიანმა ითამაშა, ბოლო 23 წუთი გაატარა მინდორზე, თუმცა მისი შესვლის დროს ანგარიში 1:5 იყო. დავით სხირტლაძე სათადარიგო იყო, ხოლო მათე ვაწაძეს ტრავმა აქვს. “ორჰუსი” მეექვსე ადგილზეა.