არგენტინა ესპანეთში მიმდინარე მსოფლიოს ჩემპიონატზე მანუ ჯინობილის გარეშე თამაშობს, თუმცა, პატაგონიელებმა დაამტკიცეს, “სან ანტონიოს” ვარსკვლავის გარეშეც დიდ ძალას რომ წარმოადგენენ. 2004 წლის ოლიმპიურმა ჩემპიონებმა სევილიას “პალასიო მუნისიპალ დე დეპორტეს სან პაბლოს” არენაზე, 5300 მაყურებლის თანდასწრებით პუერტო რიკო 98:75 გაანადგურეს.

გადამწყვეტი მესამე პერიოდი გამოდგა, რომელიც ხულიო ლამასის შეგირდებმა 24:11 მოიგეს და მეოთხეშიც უპირატესობა ხელიდან არ გაუშვიათ. არგენტინელთა შემადგენლობაში ერთბაშად შვიდმა კალათბურთელმა გააკეთა 8 და მეტი ქულა, ყველაზე მეტად კი თავი ვეტერანებმა ანდრეს ნოჩიონიმ (18 ქულა, 11 მოხსნა), ლუის სკოლამ (20ქ, 9მ) და ვალტერ ერმანმა (12ქ, 10მ) გამოიჩინეს.

გასული ევრობასკეტის მასპინძელმა სლოვენიამ ავსტრალიას ძირითადად ზუსტი ტყორცნების მეშვეობით სძლია. იურე ზდოვცის ბიჭებმა თამაშიდან სროლათა რეალიზაციის პროცენტი 57-ს გაუტოლეს, ამასთან სამქულიანების ზუსტად ნახევარი გამოიყენეს ზუსტად. ბალკანელთაგან ყველაზე მეტად გორან დრაგიჩი გამოირჩა, რომელმაც 21 ქულას 7 მოხსნა და 4 შედეგიანი გადაცემა მიამატა.

2014 წლის მსოფლიოს ჩემპიონატზე “უაილდ ქარდის” წყალობით გასულ ბრაზილიას სამუნდიალე განაცხადში ეროვნული საკალათბურთო ასოციაციის 4 მოთამაშე (ვარეჟაო, ბარბოზა, ილარიო, სპლიტერი) ჰყავს, საფრანგეთი კი ესპანეთს შემადგენლობაშესუსტებული ეწვია. ამის მიუხედავად, ევროპის მოქმედმა ჩემპიონმა კარგად დაიწყო და პირველი პერიოდი 7 ქულითაც მოიგო, მაგრამ თანდათან ბრაზილიელებმა დაცვაში თამაში მოაწესრიგეს, მეორე ტაიმის განმავლობაში უპირატესობას ფლობდნენ და მცირე სხვაობითაც იმარჯვეს. გამარჯვებულთაგან თავი ყველაზე მეტად ევროპაში, კერძოდ „ბარსელონაში“ მოთამაშე 31 წლის უკანახაზელმა მარსელინიო უერტასმა გამოიჩინა. მის აქტივში 16 ქულა და შედეგიანი პასია. 

მსოფლიოს ჩემპიონატი კალათბურთში

სევილია. ჯგუფი B

პუერტო რიკო – არგენტინა 75:98 (19:27, 19:18, 11:24, 26:29)

ჯგუფი D

ლას პალმასი. ავსტრალია – სლოვენია 80:90 (19:27, 24:22, 17:20, 20:21)

გრანადა. ჯგუფი A

საფრანგეთი – ბრაზილია 63:65 (18:11, 8:17, 15:18, 22:19)