ვაჟთა შორის საქართველოს პირველი ჩოგანი ნიკოლოზ ბასილაშვილი უზბეკეთის ქალაქ კარშის საერთაშორისო ტურნირში (საპრიზო ფონდი 50 ათასი დოლარი) ჩაება და პირველი გამარჯვება იზეიმა.

ბასილაშვილი საწყის რაუნდში მე-7 ნომრად განთესილ იაპონელ შუიჩი სეკიგუჩის დაუპირისპირდა და დამაჯერებლად – 6:1, 6:4 მოიგო. თამაში საათზე ცოტა მეტხანს გაგრძელდა და ნიკოლოზს საკუთარი მოწოდება არცერთხელ დაუთმია, თავად კი 5-დან 3 ბრეიკ-პოინტი გამოიყენა.

მერვედფინალში გასვლის წყალობით, ქართველმა ჩოგბურთელმა 7 სარეიტინგო ქულა გამოიმუშავა, მისი მომდევნო მეტოქე კი ტაივანელ ტაი ჩენს და კვალიფიკაციის გამარჯვებულ ფრანგ – ლორენ როჩეტსს შორის უმჯობესი იქნება.

ცნობისთვის, პროფესიონალ ჩოგბურთელთა ასოციაციის (ATP) განახლებულ რეიტინგში ბასილაშვილს 157 ქულით 294-ე ადგილი უკავია, მის შემდეგ კი, ქართველთაგან საუკეთესო მაჩვენებელი ალექსანდრე მეტრეველს გააჩნია – 39 ქულა და 650-ე პოზიცია.

7 ქართველი ჩოგბურთელი მოხვდა ქალთა საჩოგბურთო ასოციაციის (WTA) კლასიფიკაციაში. მათგან უმაღლესი მაჩვენებელი სოფო შაფათავას აქვს, რომელიც 3 ადგილით დაწინაურდა და 285 ქულით 203- საფეხურზეა.

203 (206). სოფო შაფათავა – 285 ქულა; 351 (352). ოქსანა კალაშნიკოვა – 117; 369 (373). ეკატერინე გორგოძე – 111; 440 (440). მაკა ჩახნაშვილი-რანცინგერი – 81; 616 (615). სოფო ქვაცაბაია – 43; 1154 (1160). მარიამ ბოლქვაძე – 6; 1248 (1249). თამარ ჭალაგანიძე – 3.

მიმდინარე კვირაში ქართველთაგან ყველაზე პრესტიჟულ ტურნირზე ოქსანა კალაშნიკოვა თამაშობს. გერმანიის ქალაქ ნიურნბერგში მიმდინარე NURNBERGER VERSICHERUNGSCUP 2014-ზე (საპრიზო ფონდი 250 ათასი დოლარი) კალაშნიკოვა და პოლონელი კატარჟინა პიტერი მე-4 ნომრად არიან განთესილნი და პირველ რაუნდში ბელარუს პოლინა პეხოვას და გერმანელ ნინა ზანდერს გაეჯიბრებიან.

იტალიის ქალაქ კასერტას 10-ათასიან ტურნირში ითამაშებენ ეკატერინე გორგოძე და სოფო ქვაცაბაია. მე-6 განთესვის მქონე გორგოძე “უაილდ ქარდის” მქონე იტალიელ სარა ეჩელს დაუპირისპირება, ხოლო ქვაცაბაია ძალებს დომინიკელ ფრანჩესკა სეგარელისთან მოსინჯავს.

წყვილებში ქართველ გოგონებს მე-2 რეიტინგი გააჩნიათYდა ბრძოლაში პირდაპირ მეოთხედფინალიდან ჩაებმებიან. მათი მეტოქე იტალიურ ჯახში ირკვევა – ალესანდრელი და სირილო კიეზას და ხსენებული ეჩელის წინააღმდეგ.

შარმ ელ შეიხის 10-ათასიანი ტურნირის საწყის რაუნდში ეგვიპტელ ოლა აბუ ზაკრის ეთამაშება თამარ ჭალაგანიძე. წყვილთა შეჯიბრში ჭალაგანიძე და ინდოელი აშმიტა ეასვარამურტი უკრაინელ ჩოგბურთელებს (ივანიჩენკო-სტოტიკა) გაეჯიბრებიან.

დასასრულ, ისრაელის ქალაქ რამლეში მიმდინარე 10-ათასიან ტურნირზეც ვთქვათ, რომელშიც მარიამ ბოლქვაძე ჩაებმება. მისი პირველი მეტოქე კვალიფიკაციის ერთ-ერთი გამარჯვებული შირ აზრანი (ისრაელი) იქნება. წყვილებში ბოლქვაძე და ბრიტანელი მანიშა ფოსტერი მასპინძელთა დუეტს (კიმჰი-ნიკოლაევა) ეთამაშებიან.