ქართველი ჩოგბურთელი ნიკოლოზ ბასილაშვილი გერმანიის ქალაქ მარბურგში იმყოფება და ადგილობრივი ჩელენჯერის (საპრიზო ფონდი 35 ათასი დოლარი) პირველ რაუნდში გამარჯვებაც იზეიმა.

“მარბურგ ოუფენ 2014”-ის საწყის შეხვედრაში ბასილაშვილი ჩეხ იაროსლავ პოსპიშილს დაუპირისპირდა და 33 წლის მეტოქე საათსა და 23 წუთში 6:4, 6:3 დაამარცხა. 22 წლის ქართველმა ჩოგბურთელმა 5-დან 4 ბრეიკ-პოინტი გამოიყენა, თავად კი მოწოდება 2-ჯერ დათმო.

ცნობისთვის, ბასილაშვილს პროფესიონალ ჩოგბურთელთა ასოციაციის (ATP) რეიტინგში 241 ქულით 207-ე ადგილი უკავია და პოსპიშილს 12 პოზიციით უსწრებს.

მერვედფინალში გასვლის წყალობით, ნიკოლოზმა 6 სარეიტინგო ქულა მიიღო, მისი შემდეგი მეტოქის ვინაობა კი მე-6 ნომრად განთესილ ჰოლანდიელ ტიემო დე ბაკერსა და ჩეხ ადამ პავლაშეკს შორის მატჩში გაირკვევა.

წყვილთა ტურნირში ბასილაშვილი ბელარუს ვლადიმირ იგნატიკთან გახლავთ შეამხანაგებული და პირველ რაუნდში იმავე პოსპიშილის და ხორვატი ფრანკო სკუგორის დუეტს გაეჯიბრება.