ბრიტანული მედიიის ინფორმაციით, “ნიუკასლის” ჯერ კიდევ მოქმედი დამრიგებელი ალან პარდიუ უახლოეს მომავალში “კრისტალ პალასის” ახალი მწვრთნელი გახდება. 53 წლის “კაჭკაჭების” თავკაცმა უკვე მიაღწია შეთანხმებას ყოფილ კლუბთან. ინგლისელი უახლოეს მომავალში ლონდონელებთან 4-წლიან კონტრაქტსაც გააფორმებს და ხელფასის სახით 2 მილიონ გირვანქას მიიღებს.

“კრისტალ პალასის” ოფიციალურ ვებგვერდს აღნიშნული შეთანხმების შესახებ ინფორმაცია ჯერ არ გაუვრცელებია. პარდიუს “იუნაიტედთან” კონტრაქტი 2020 წლის ივლისამდე აკავშირებს და როგორც ინგლისური მედია იუწყება, “ნიუკასლი” ამ გარიგების სანაცვლოდ 2 მილიონ გირვანქას მიიღებს.

53 წლის სპეციალისტისთვის “კრისტალ პალასი” უცხო კლუბი ნამდვილად არააა. მოქმედი ფეხბურთელობის პერიოდში ინგლისელი 4 სეზონის განმავლობაში (1987-1991) “არწივების” შემადგენლობაში ასპარეზობდა.

ალან პარდიუ “კრისტალ პალასში” ნილ უორნოკს შეცვლის, რომელიც “საუთჰემპტონთან” პრემიერლიგის მე-18 ტურის საშინაო მატჩის წაგების (1:3) შემდეგ დაითხოვეს.