ალბათ ყველას გვინახავს უკვდავი ვიდეოკადრები, რომელზეც ასახულია 8-9 წლის დიეგო მარადონა როგორ კენწლავს ბურთს. ალბათ ისიც გვინახავს, უკვე სიჭაბუკეში შესული დიეგო არგენტინელ ჟურნალისტს რამდენიმე სიტყვას რომ ეუბნება და ესპანური ენის ცოდნა სულაც არაა საჭირო იმის გასაგებად, რომ დიეგო თავის მომავალზე საუბრობს, ოცნების ასრულების დიდი იმედი აქვს და ფეხბურთის ჭეშმარიტი ვარსკვლავი გახდება.

დიეგო მარადონას წინააღმდეგობებითა და სკანდალებით აღსავსე ცხოვრების შესახებ ყველამ ყველაფერი ვიცით, თუმცა როდესაც უგო ჩავესთან ანდა ედუარდ კოკოითთან ხელის ჩამომრთმევ მარადონაზე ვსაუბრობთ, თითქმის არასოდეს გვახსენდება დასაწყისში ჩვენს მიერ ხსენებული კადრები - 9 წლის მარადონა ბურთს კენწლის. მარადონას სახელი მაშინ ჯერ არაფერს ნიშნავდა. დიეგო ერთი ჩვეულებრივი არგენტინელი ბავშვი იყო თავისი ბავშვური საფიქრალით.

ერთხელ, სკოლიდან ახლადდაბრუნებულმა დიეგო მარადონამ აღმოაჩინა, რომ სახლში საჭმელი არ ჰქონდათ, გასაყიდიც აღარაფერი დარჩენილიყო, მამამისი პორტში იყო წასული დღიური სამუშაოს საშოვნელად, დედამისი კი უკვე შეგუებოდა ბეჩავ ყოფას და რეალობისათვის წინააღმდეგობის გაწევაც კი უჭირდა. დიეგომ სკოლის ტანსაცმელი გაიხადა, მაისური, შორტები, კედები ჩაიცვა და მეზობლად მდებარე ხილის ბაზარში შევიდა, სადაც შეგროვილ ხალხს განუცხადა, რომ აიღებდა ფორთოხალს და მიწაზე დაუშვებლად ასჯერ აკენწლიდა. “თუ ვერ ავკენწლე, ან ფორთოხალი დამივარდება, ერთი კვირა უფასოდ მოგეხმარებით ყველას. თუ ავკენწლე, აი ამ ბადეში რაც ხილი ჩაეტევა, უნდა გამატანოთ“, - თქვა პატარა დიეგომ და შორტის ჯიბიდან ნაქსოვი ბადე ამოიღო.

ხილის გამყიდველებმა ამ უცნაური ბავშვის კიდევ უფრო უცნაური გამოწვევა მიიღეს, მისცეს ერთი ცალი ფორთოხალი და სეირის საყურებლად შემოიკრიბნენ თმახუჭუჭა დიეგიტოს გარშემო. მარადონამ, რა თქმა უნდა, დანაქადნები აასრულა, ფორთოხალი ასჯერ აკენწლა, ბადურა ხილით გაავსო და გამყიდველების აპლოდისმენტების თანხლებით გასწია სახლისაკენ. იმ დღეს მარადონას და დედამისს მშივრებს არ დაუძინიათ. დიეგოსათვის დედამისს ისიც კი არ უკითხავს, სად იშოვა ამდენი ხილი პატარა ბიჭმა. ალბათ ჯობდა, რომ ეკითხა, თუმცა ეს ნამდვილად არაა მთავარი.

ამის შემდეგ გავა წლები და ერთ-ერთ იტალიელ ჟურნალისტთან საუბრისას უკვე ფეხბურთის გენიოსად სახელდებული დიეგო მარადონა იტყვის: “პელეს და ჩემი შედარებაც კი სასაცილოდ მიმაჩნია, რადგან პელეზე ბევრად დიდი ვარ. რატომ? ალბათ იმიტომ, რომ რასაც პელე ბურთით აკეთებდა, მე იგივეს შესრულება ფორთოხლით შემიძლია!“. დიეგოს ეს გამოთქმა მრავალნაირადაა განხილული და დამსახურებული კრიტიკაც არაერთგზის მიიღო. მარადონა ხომ ნარცისი და საკუთარ თავზე შეყვარებული კაცია, რომელსაც თავის ქების არასოდეს ერცხვინება. მაგრამ გადავდოთ ობიექტურობა გვერდით და ვაღიაროთ, რომ დიეგო პელეზე დიდი მართლაც იყო. თან ფორთოხლით, ფორთოხლით...