ბრიტანული მედიის ინფორმაციით, ბრაზილიის ნაკრების ნახევარმცველმა ვილიანმა შესაძლოა ლონდონის "ჩელსისთან" კონტრაქტი გაახანგრძლივოს. როგორც ირკვევა, "არისტოკრატები" სამხრეთამერიკელის თამაშით კმაყოფილნი არიან და ხელშეკრულების გახანგრძლივება და პირობების გაუმჯობესება სურთ.

26 წლის ფეხბურთელს ლონდონელებთან კონტრაქტი 2018 წლის ივნისის ბოლომდე აქვს გაფორმებული. მიმდინარე სეზონში ბრაზილიელმა ნახევარმცველმა პრემიერლიგასა და ჩემპიონთა ლიგაზე 19 მატჩი ჩაატარა და 2-2 გოლითა და საგოლე გადაცემით გამოირჩა.

ვილიანმა ლონდონურ კლუბში თამაშით ნაკრების რიგებშიც დაიმსახურა ადგილი და ბრაზილიაში გამართულ მუნდიალზეც ითამაშა. სულ ვილიანმა "სელესაოს" მაისურით 19 მატჩში მიიღო მონაწილეობა და 4 გოლიც გაიტანა.