არგენტინის ეროვნული ნაკრების და ტურინის "იუვენტუსის" თავდამსხმელმა კარლოს ტევესმა მადრიდის "ატლეტიკოსთან" ფრედ (1:1) დასრულებული მატჩის შემდეგ განაცხადა, რომ "ბიანკონერისთვის" ჩემპიონთა ლიგა ახლა იწყება.

"პირველ ნახევარში გოლის გატანის შანსი გვქონდა და მეტოქეც გახსნილ ფეხბურთს თამაშობდა. შესვენების შემდეგ "ატლეტიკო" დაცვაში ჩაიკეტა და თამაში შეუძლებელი გახდა. ჩემპიონთა ლიგა ჩვენთვის ახლა იწყება და შემდეგ ეტაპზე ვინ შეგვხვდება, ამას განსაკუთრებულ მნიშვნელობას არ ვანიჭებ. მთავარი შემდეგ ეტაპზე გასვლა იყო. მწვრთნელი ყოველთვის მოედანზე ბოლომდე დახარჯვისკენ მოგვიწოდებს. ვინც არ უნდა შეგვხდეს, თავს შევაკლავთ, ესაა "იუვენტუსის" მენტალიტეტი." - განაცხადა არგენტინელმა.

ტურინელებმა A ჯგუფში მეორე ადგილი 10 ქულით დაიკავეს. ჩემპიონთა ლიგის კენჭისყრა 15 დეკემბერს გაიმართება და "იუვენტუსის" მეტოქეც ამ დღეს გაირკვევა. ამ ეტაპზე ჯგუფებში პირველ ადგილზე გასულთა ვინაობა თითქმის ცნობილია.

"იუვენტუსის" პოტენციური მეტოქე შემდეგი გუნდები იქნებიან: მადრიდის "რეალი", "მონაკო", დორტმუნდის "ბორუსია", მიუნხენის "ბაიერნი", ლონდონის "ჩელსი", "პორტუ". პსჟ და "ბარსელონა" ურთიერთობას დღეს გაარკვევენ და ერთ-ერთი მათგანი "ბიანკონერის" სავარაუდო მეტოქე გახდება.