ყაზანის “რუბინი”, რომელშიც სოლომონ კვირკველია და მამუკა კობახიძე გამოდიან, ზამთრის შესვენებაზე გამარჯვებით გავიდა.

რუსეთის საფეხბურთო პრემიერლიგის მე-17 ტურში, ყაზანელებმა სტუმრად სარანსკის “მორდოვია” 1:0 დაამარცხეს. გამარჯვების გოლი პირველი ტაიმის 41-ე წუთზე ედუარდომ გაიტანა. ცენტრალურმა მცველმა კვირკველიამ შეუცვლელად ითამაშა და 57-ე წუთზე ყვითელი ბარათი მიიღო. 22 წლის მცველმა რუსეთის პრემიერლიგის პირველ ეტაპზე 17-ივე შეხვედრა სრულად ჩაატარა. “რუბინის” კიდევ ერთი ქართველი უკანახაზელი მამუკა კობახიძე სათადარიგო იყო, მაგრამ არ უთამაშია. “რუბინი” 27 ქულით 16 გუნდში მეშვიდეა.

მოსკოვის “სპარტაკმა” შინ ეკატერინბურგის “ურალს” 2:0 აჯობა. შემტევი ნახევარმცველი ჯანო ანანიძე მოსკოველთა 18-კაციან განაცხადში არ იყო. მან ერთი დღით ადრე “სპარტაკის” დუბლშემადგენლობაში ითამაშა. საქმეს ისეთი პირი უჩანს, რომ თუ ანანიძემ სხვა კლუბი არ მოძებნა, მას მოსკოველთა რიგებში საასპარეზო პრაქტიკა არ ექნება.