„ევერტონთან“ „არსენალის“ ფრით „ლივერპულმა“ ვერ ისარგებლა და უპირატესობის გაზრდის ნაცვლად, ისე გამოვიდა, რომ შემცირდა.

არნე სლოტის გუნდი, რომელიც ბოლო დროს არც ისე დამაჯერებელია, ლონდონში, „ფულემთან“ 2:3 დამარცხდა. ალექსის მაკალისტერის გოლით „წითლები“ სწრაფად დაწინაურდნენ, მაგრამ სწრაფადვე, 14-წუთიან ინტერვალში სამი გოლი გაუშვეს და პირველივე ტაიმში ჩამორჩნენ. მეორე ნახევარში ლუის დიასმა შეამცირა სხვაობა, თუმცა ეს იყო მაქსიმუმი - 2:3.

მარცხის მიუხედავად „ლივერპულის“ უპირატესობა დიდია - 11 ქულა. სლოტის გუნდს მომდევნო ტურში „ვესტ ჰემის“ მასპინძლობა მოუწევს. „ფულემი“ 48 ქულით მერვეა და ევროზონაში შესასვლელად იბრძვის.

ქულები დაკარგა „ჩელსიმ“, რომელიც „ბრენტფორთან“ უგოლო ფრეს (0:0) დასჯერდა. ენცო მარესკას გუნდი 53 ქულით მეოთხეა. „ტოტენჰემმა“ ღრმა აუტსაიდერი „საუთჰემპტონი“ 3:1 დაამარცხა და მე-13 ადგილზე აინაცვლა. სხვათა შორის, დღეს „საუთჰემპტონი“ ოფიციალურად გავარდა, რადგან სულ რაღაც 10 ქულა აქვს და დარჩენილ 7 ტურში გასავარდნ ზონას თავს ვერ დააღწევს.