„ლიონის“ მთავარმა მწვრთნელმა პაულუ ფონსეკამ გიორგი მიქაუტაძეზე ისაუბრა. როგორც მან თქვა, ქართველ ფეხბურთელს ადრე ყოველთვის ბურთთან შეხება უნდოდა, მაგრამ იმუშავეს და ახლა მან იცის, როდის უნდა დაელოდოს შესაფერის მომენტს.

"ჟორჟისგან განსხვავებულს არაფერს ვითხოვ. თავიდანვე იგივეს ველოდი მისგან. ის კარგ პერიოდს გადის, მაგრამ ჩვენ ასევე გვყავს ალექსანდრე ლაკაზეტი, გუნდისთვის ძალიან მნიშვნელოვანი მოთამაშე. ამ კვირაში უფრო შეტევაში ვიმუშავეთ, ვიდრე დაცვაში. ჟორჟის პროგრესი ასევე ასახავს გუნდის პროგრესს. გუნდი თავდამსხმელს გოლის გატანის შანსებს უქმნის. როცა გუნდში მოვედი, ის უფრო ინსტინქტური იყო, ბევრს დარბოდა და ყოველთვის უნდოდა ბურთთან შეხება. ჩვენ ვიმუშავეთ მის მოთმინებაზე, ბურთის შეხებისთვის შესაფერისი მომენტის მოლოდინზე. ვფიქრობ, ჟორჟს აქვს უნარი, რომ სხვადასხვა ასპექტში განვითარდეს.

ფაქტია, „პარი სენ-ჟერმენი“ უფრო ძლიერი გუნდია. მათი ინვესტიციები განსხვავდება სხვა კლუბებისგან და ჩემთვის ეს დომინაცია ნორმალურია. თუ მათ შეუძლიათ ასე ადრე გახდნენ ჩემპიონები, ეს იმიტომ, რომ ისინი ამას იმსახურებენ. მაგრამ ეს ეჭვქვეშ არ აყენებს ჩემპიონატის ხარისხს. მხოლოდ იმიტომ, რომ პსჟ უკვე ჩემპიონია, არ ნიშნავს რომ ლიგა 1 ნაკლებად კონკურენტუნარიანია. სხვა ლიგებშიც მსგავსი სიტუაციაა. ჩვენი ჩემპიონატი ძალიან კონკურენტუნარიანი რჩება, თქვენ უბრალოდ უნდა დააკვირდეთ იმ გუნდების რაოდენობას, რომლებსაც შეუძლიათ ჩემპიონთა ლიგაზე გასვლა.

ვუთხარი ფეხბურთელებს, რომ ისინი, ვინც უკვე ფიქრობენ „მანჩესტერზე“, არ ითამაშებენ. კონცენტრირებულები უნდა ვიყოთ „ლილთან“ მატჩზე, რომელიც ისეთივე მნიშვნელოვანია, როგორც „მანჩესტერთან“.

კარგად ვიცნობ „ლილის“ მოთამაშეებს, მაგრამ ისინიც მიცნობენ. მათ იციან, როგორ მიყვარს თამაში, ძალიან კარგად მიცნობენ. „ლილი“ შესანიშნავი გუნდია, რომელიც ლამაზ ფეხბურთს თამაშობს. არ ვფიქრობ, რომ ეს უპირატესობას მაძლევს. არ აქვს მნიშვნელობა მეტოქეს, ჩვენ უნდა გამოვავლინოთ ჩვენი ამბიცია მოედანზე. მინდა ვნახო გუნდი, რომელსაც დიდი სურვილი აქვს. „ლილს“ ჰყავს მაღალი ხარისხის მწვრთნელი და შესანიშნავი ფეხბურთელები.

დარჩენილია შვიდი თამაში და გუნდებს შორის სხვაობა ძალიან მცირეა. ეს არ იქნება გადამწყვეტი მატჩი, მაგრამ მნიშვნელოვანი მატჩი იქნება უშუალო კონკურენტის წინააღმდეგ და ამ თამაშის მოგება გვინდა.

„სტრასბურთან“ პირველ ტაიმში ბევრი კარგი რამ გავაკეთეთ. მაგრამ ასევე დავუშვით შეცდომები, რამაც საშუალება მისცა „სტრასბურს“ გაეტანა ოთხი გოლი. უნდა გვესმოდეს, რომ ყველა მატჩი რთულია. ჩვენ უნდა გამოვიყენოთ ჩვენი შანსები, როდესაც ბევრი გვაქვს, მაგრამ ასევე კარგად დავიცვათ თავი, როდესაც გოლის გატანის შანსი არ გვაქვს. ვფიქრობ, მენტალურმა ასპექტმაც ითამაშა როლი. ეს მატჩი ჩვენთვის გაკვეთილი უნდა გამოდგეს. პირველ ტაიმში ბევრი ხარისხი ვაჩვენეთ, მაგრამ მეორე ტაიმიდანაც უნდა ვისწავლოთ. დაცვაში, არ ვიყავით ადეკვატური. ბევრი შეცდომა დავუშვით, რაც ძვირად დაგვიჯდა“, - თქვა ფონსეკამ.

გიორგი მიქაუტაძეს „ლიონის“ მაისურით ყველა ტურნირზე 38 მატჩში 14 გოლი აქვს გატანილი და 8-ჯერ საგოლე პასით გამოირჩა. კონკრეტულად ტურნირებზე გიორგის სტატისტიკა ასე ნაწილდება: ლიგა 1-ში 27 მატჩი, 8 გოლი და 4 საგოლე პასი, საფრანგეთის თასზე 2 მატჩი, 2 გოლი და ევროპა ლიგაზე 9 მატჩი, 4 გოლი და 4 საგოლე პასი.

„ლიონისა“ და „ლილის“ მატჩი 5 აპრილს, თბილისის დროით 23:00 საათზე გაიმართება.