საქართველოს ნაკრების და „ლევანტეს“ ფეხბურთელი გიორგი ქოჩორაშვილი კარიერას ლისაბონის „სპორტინგში“ გააგრძელებს. ეს ინფორმაცია ოფიციალურად დადასტურდა.

როგორც „ლევანტეს“ ვებგვერდი იტყობინება, კონტრაქტს ხელი ქოჩორაშვილმა უკვე მოაწერა. გიორგი ესპანურ კლუბში მიმდინარე წლის 30 ივნისამდე იჯარით დარჩება და პორტუგალიური ფეხბურთის გრანდს ზაფხულში შეუერთდება. კონტრაქტი 2030 წლამდე გაფორმდა და "სპორტინგიდან" ქოჩორაშვილის გამოსასყიდი ფასი 80 მილიონი ევრო იქნება.

ფინანსურ დეტალებზე ოფიციალურ განცხადებაში არაფერია ნათქვამი, მაგრამ ესპანური მედიის ცნობით, „ლევანტემ“ 5.5 მილიონი ევრო მიიღო, რასაც ბონუსის სახით 1.5 მილიონიც დაემატება.

გიორგი ქოჩორაშვილი „ლევანტეს“ 2019 წელს შეუერთდა და მალევე, ლა ლიგაში დებიუტი ჰქონდა „ბილბაოს“ წინააღმდეგ. შემდეგ ის „კასტელონში“ იყო განათხოვრებული, ხოლო ვალენსიური კლუბის ძირითადი შემადგენლობის უცვლელ წევრად 2023 წლიდან იქცა. მან დღემდე „ლევანტეში“ 57 მატჩი ჩაატარა და 9 გოლი გაიტანა.

საქართველოს ნაკრებში დებიუტი ქოჩორაშვილს 2023 წელს ჰქონდა და 19 შეხვედრაში 3 გოლი აქვს გატანილი.

„სპორტინგს“ ზედმეტი წარდგენა არ სჭირდება, პორტუგალიის ჩემპიონი 20-ჯერ გახდა, 21-ჯერ თასი მოიგო, 10-ჯერ სუპერთასი, ხოლო ერთხელ თასების თასი. მიმდინარე სეზონში პორტუგალიის ჩემპიონატს ლიდერობს და უახლოეს მდევარ „ბენფიკას“ 3 ქულით უსწრებს.